Asebter amenzawi

Taẓrigt tis snat n « Alger Fashion Week » i uqeddem n telkimt tadzayrit

LEZZAYER TAMANEɣT – Tebda tedyant n « Alger Fashion Week » (dduṛt n telkimt n Lezzayer Tamaneɣt) ass n lexmis tameddit deg Tufiṛat n Lezzayer, i lmend n uqeddem n yixeddimen imaynuten n yimesɣaniben idzayriyen.

Deg wass amezwaru n tedyant-a (ara ikemmlen arma d ass n ssebt), ttwaqeddmen-d yiceḍḍiḍen n sin n yimesɣaniben idzayriyen.

Amesɣanib Karim Kadid yettekka yagi deg waṭas n yemsudɣen (ɛuruḍ) n telkimt ama deg Lezzayer, ama deg wezɣar, iqeddem-d talkensit n yiselsa insayanen ay d-yemyezgen d telkimt akken igerrez.

Iceḍḍiḍen-nnes ttwassnen s tesrifa (anaqa) d tdugi-nsen tucbiḥt, yernu yessen umesɣanib-a amek ara yesdukkel ansay d tetrara. Yiwen seg yiceḍḍiḍen-nnes ay d-ijebden lwelha d akaraku umi yerna kra n ṣṣifat titrarin.

Ma d tamesɣanibt Zineb Amoura tekcef-d talkensit aydeg tessexleḍ initen deg yiceḍḍiḍen insayanen, yernu teḍfer aɣanib d « amiran » (muɛaṣir) deg uxeddim-nnes.

Uqbel ma yebda-d wemsadeɣ-a, sɛeddan-d yiwen n uhanay n tkurigṛafit n uceḍḍaḥ adzayri Yacine Gouasmia. Teḥdeṛ deg tfugla-a, daɣ, tcennayt tadzayrit Amel Zen, ay d-yecnan yiwet seg tezlatin-nnes.