ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵎⴻⵖⵔⴰⴷ ⵍⵍⴰⵏ ⴷⴻⴳ-ⵙ 2.000 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⴰⵣⴻⵍⵍⴰⵡⴻⵏ (ⵜⴰⵣⵔⴰⵡⵜ)

ⵒⴰⵔⵉⵙ – ⵍⵍⴰⵏ ⴷⴻⴳ ⵓⵎⴻⵖⵔⴰⴷ ⴰⵣⴰⵍ ⵏ 2.000 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⴰⵣⴻⵍⵍⴰⵡⴻⵏ, ⵏⴻⵖ « 10 ⵏ ⵜⵉⴽⴽⴰⵍ ⵓⴳⴰⵔ » ⵏ ⵡⴰⵏⴻⵛⵜ ⴰⵢ ⵍⵍⴰⵏ ⵜⵜⵅⴻⵎⵎⵉⵎⴻⵏ ⵢⵉⵎⵓⵙⵙⴰⵏⴻⵏ ⴰⵔ ⴰⵙⵙ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵢⵉⵡⴻⵜ ⵏ ⵜⴻⵖⵍⴰⵎⵜ ⵜⴰⴳⵔⴰⵖⵍⴰⵏⵜ ⵏ ⵢⵉⵎⴻⵙⵏⴰⵍⵍⵓⵏⴻⵏ ⴷⴻⴳ ⵢⵉⵡⴻⵜ ⵏ ⵜⴻⵣⵔⴰⵡⵜ (ⴷⵉⵔⴰⵙⴰ) ⴰⵢ ⴷ-ⵢⴻⴼⴼⵖⴻⵏ ⴰⵙⵙ ⵏ ⵍⴻⵅⵎⵉⵙ.

ⴷⴻⴳ ⵢⵉⵙⴻⴳⴳⴰⵙⴻⵏ-ⴰ ⵉⵏⴻⴳⴳⵓⵔⴰ, ⵍⵍⴰⵏ ⵢⵉⵎⴻⵙⵏⴰⵍⵍⵓⵏⴻⵏ ⵜⵜⵅⴻⵎⵎⵉⵎⴻⵏ ⴷⴰⴽⴽⴻⵏ ⴰⵎⴻⵖⵔⴰⴷ ⵢⴻⵙⵄⴰ ⴳⴰⵔ 100 ⴷ 200 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⴰⵣⴻⵍⵍⴰⵡⴻⵏ.

ⵜⴰⵖⵍⴰⵎⵜ ⵏ ⵡⴻⵒⵕⵓⴼⵉⵙⵓⵔ ⵛⵀⵔⵉⵙⵜⵧⵒⵀⴻⵔ ⵛⵧⵏⵙⴻⵍⵉⵛⴻ, ⵏ ⵜⴻⵙⴷⴰⵡⵉⵜ ⵏ ⵏⵧⵜⵜⵉⵏⴳⵀⴰⵎ (ⴱⵔⵉⵟⴰⵏⵢⴰ ⵜⴰⵎⴻⵇⵔⴰⵏⵜ), ⵜⴻⵅⴷⴻⵎ ⴰⵟⴰⵙ ⵖⴻⴼ ⵢⵉⵙⴻⴼⴽⴰ (ⵎⵓⵄⵟⴰⵢⴰⵜ) ⵏ ⵓⵜⵉⵍⵉⵙⴽⵓⵒ ⴰⵍⵍⵓⵏⴰⵏ ⵏ ⵀⵓⴱⴱⵍⴻ ⴰⵢ ⴷ-ⴳⴰⵏⵜ ⵏⴰⵙⴰ ⴷ ⵜⵏⴻⴳⴳⴰ ⵜⴰⵍⵍⵓⵏⴰⵏⵜ ⵜⵓⵕⵓⴼⵉⵜ, ⴰⵎ ⵡⴰⴽⴽⴻⵏ ⴰⵢ ⵜⴻⵅⴷⴻⵎ ⵖⴻⴼ ⵢⵉⵙⴻⴼⴽⴰ ⵏ ⵢⵉⵜⵉⵍⵓⵙⴽⵓⵒⴻⵏ ⵏⵉⴹⴻⵏ.

ⵙⴰⴽⴽⵉⵏ, ⵜⴻⴱⵏⴰ-ⴷ ⵜⵓⴳⵏⵉⵡⵉⵏ ⵏ 3 ⵏ ⵜⵙⴻⴽⵜⵉⵡⵉⵏ ⵢⴻⵔⵏⵓ ⵜⴳⴰ-ⴷ ⵍⴻⵃⵙⴰⴱ ⵏ ⵡⴻⵎⴹⴰⵏ ⵏ ⵢⵉⵎⴰⵣⴻⵍⵍⴰⵡⴻⵏ ⴷⴻⴳ ⵜⴰⵍⵍⵉⵢⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵓⵎⴻⵣⵔⵓⵢ ⵏ ⵓⵎⴻⵖⵔⴰⴷ. ⵙⵉⵎⴰⵍ ⵜⵜⵉⵍⵉⵏ ⵢⵉⵎⴰⵣⴻⵍⵍⴰⵡⴻⵏ ⴱⴻⵄⴷⴻⵏ, ⵙⵉⵎⴰⵍ ⵉⵡⴻⵄⵄⴻⵕ ⵖⴻⴼ ⵜⴰⴼⴰⵜ-ⵏⵙⴻⵏ ⴰⴽⴽⴻⵏ ⴰⴷ ⴰⵖ-ⴷ-ⵜⴰⵡⴻⴹ. ⵉⵜⵉⵍⵉⵙⴽⵓⵒⴻⵏ ⵏ ⵡⴰⵙⵙ-ⴰ ⵜⵜⴰⴵⴵⴰⵏ-ⴰⵖ ⴽⴰⵏ ⴰⴷ ⵏⴻⵣⵔⴻⵡ 10% ⵙⴻⴳ ⵢⵉⵎⴰⵣⴻⵍⵍⴰⵡⴻⵏ.

« ⴷ ⴰⵢⴻⵏ ⵢⴻⵙⵙⴻⵡⵀⴰⵎⴻⵏ ⵎⵉ ⴰⵔⴰ ⵏⵅⴻⵎⵎⴻⵎ ⴷⴰⴽⴽⴻⵏ 90% ⵙⴻⴳ ⵢⵉⵎⴰⵣⴻⵍⵍⴰⵡⴻⵏ ⵏ ⵓⵎⴻⵖⵔⴰⴷ ⴰⵢ ⴰⵖ-ⵢⴻⴳⴳⵓⵏⵉⵏ ⴰⴽⴽⴻⵏ ⴰⴷ ⵜⴻⵏ-ⵏⴻⵣⵔⴻⵡ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵛⵀⵔⵉⵙⵜⵧⵒⵀⴻⵔ ⵛⵧⵏⵙⴻⵍⵉⵛⴻ. « ⴰⵏⵡⴰ ⴰⵢ ⵢⴻⵥⵔⴰⵏ ⴷ ⴰⵛⵓ ⴰⵔⴰ ⴷ-ⵏⴰⴼ ⴰⵙⵎⵉ ⴰⵔⴰ ⵏⴻⵣⵎⴻⵔ ⴰⴷ ⵏⴻⵣⵔⴻⵡ ⵉⵎⴰⵣⴻⵍⵍⴰⵡⴻⵏ-ⴰ ⵙ ⴽⵔⴰ ⵏ ⵜⵙⵓⵜⴰ ⵜⴰⵎⴰⵢⵏⵓⵜ ⵏ ⵢⵉⵜⵉⵍⵉⵙⴽⵓⵒⴻⵏ? », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴻⴳ ⵢⵉⵡⴻⵏ ⵏ ⵡⴻⵍⵖⵓ (ⴱⴰⵢⴰⵏ) ⴰⵢ ⴷ-ⵢⴻⴼⴼⵖⴻⵏ ⴷⴻⴼⴼⵉⵔ ⵎⴰ ⵜⴻⴼⴼⴻⵖ-ⴷ ⵜⴻⵣⵔⴰⵡⵜ-ⵏⵏⴻⵙ.

ⵜⴰⵖⵍⴰⵎⵜ-ⴰ ⵏ ⵢⵉⵎⴻⵙⵏⴰⵍⵍⵓⵏⴻⵏ ⵜⴻⵙⵙⴻⵇⴷⴻⵛ ⵜⴰⵔⵔⴰⵢⵉⵏ ⵏ ⵜⴰⴷⴷⴰⴷⴰⵏⵉⵏ (ⵉⵃⵚⴰ’ⵉⵢⵢⴰⵜ) ⵢⴻⵔⵏⵓ ⵜⴻⵙⵙⴻⵇⴷⴻⵛ ⵉⵙⴻⴼⴽⴰ ⵏ ⵡⴰⵢⴻⵏ ⵓⵎⵉ ⵙⴻⵎⵎⴰⵏ « ⴰⵎⴻⵖⵔⴰⴷ ⵓⵇⵔⵉⴱ » ⴰⴽⴽⴻⵏ ⴰⴷ ⵥⵔⴻⵏ ⴷ ⴰⵛⵓ ⴰⵢ ⵢⴻⵍⵍⴰⵏ ⴷⴻⴳ ⵜⴻⵎⵏⴰⴹⵉⵏ ⵜⵓⴱⵄⵉⴷⵉⵏ ⵏ ⵓⵎⴻⵖⵔⴰⴷ.