Asebter amenzawi

Ameɣrad llan deg-s 2.000 n yimelyaṛen n yimazellawen (tazrawt)

PARIS – Llan deg umeɣrad azal n 2.000 n yimelyaṛen n yimazellawen, neɣ « 10 n tikkal ugar » n wanect ay llan ttxemmimen yimussanen ar ass-a, ɣef wakken ay d-tenna yiwet n teɣlamt tagraɣlant n yimesnallunen deg yiwet n tezrawt (dirasa) ay d-yeffɣen ass n lexmis.

Deg yiseggasen-a ineggura, llan yimesnallunen ttxemmimen dakken ameɣrad yesɛa gar 100 d 200 n yimelyaṛen n yimazellawen.

Taɣlamt n wepṛufisur Christopher Conselice, n Tesdawit n Nottingham (Briṭanya Tameqrant), texdem aṭas ɣef yisefka (muɛṭayat) n utiliskup allunan n Hubble ay d-gant NASA d Tnegga Tallunant Tuṛufit, am wakken ay texdem ɣef yisefka n yitiluskupen niḍen.

Sakkin, tebna-d tugniwin n 3 n tsektiwin yernu tga-d leḥsab n wemḍan n yimazellawen deg talliyin yemgerraden n umezruy n umeɣrad. Simal ttilin yimazellawen beɛden, simal iweɛɛeṛ ɣef tafat-nsen akken ad aɣ-d-taweḍ. Itiliskupen n wass-a ttaǧǧan-aɣ kan ad nezrew 10% seg yimazellawen.

« D ayen yessewhamen mi ara nxemmem dakken 90% seg yimazellawen n umeɣrad ay aɣ-yeggunin akken ad ten-nezrew », ɣef wakken ay d-yenna Christopher Conselice. « Anwa ay yeẓran d acu ara d-naf asmi ara nezmer ad nezrew imazellawen-a s kra n tsuta tamaynut n yitiliskupen? », ɣef wakken ay d-yenna deg yiwen n welɣu (bayan) ay d-yeffɣen deffir ma teffeɣ-d tezrawt-nnes.

Taɣlamt-a n yimesnallunen tesseqdec tarrayin n taddadanin (iḥṣa’iyyat) yernu tesseqdec isefka n wayen umi semman « ameɣrad uqrib » akken ad ẓren d acu ay yellan deg temnaḍin tubɛidin n umeɣrad.