Asebter amenzawi

Tafaska tis 13 n Fisahara: d asaru n « El-Adjouad » ay d-yuwyen arraz n usaru imxeyyer

DEXLA (igriren iṣeḥrawiyen)– D asaru n « El-Adjouad » ay d-yuwyen arraz n « Welɣem Amellal » n uxeddim imxeyyer deg Tfaska Tagraɣlant tis 13 n Ssinima deg Uneẓruf (Fisahara) ay ifuken ass n ssebt tameddit deg wegrir n yezrazaɣen (laǧi’in) aṣeḥrawi n Dexla.

Asaru-a yesseḍra-t-id yemseḍru ilemẓi aṣeḥrawi Brahim Chekkaf, yernu iga-t-id ɣef yedles aṣeḥrawi, ibriden ay ḍefren Yiṣeḥrawiyen akken ad d-jemɛen ccfawat-nsen s tmucuha tiqburin ay d-yesskanayen udmawen yemgerraden n yedles d weɣref aṣeṛhawi, yernu d aya ara yeǧǧen idles n weɣraf-a ad yettwaḥrez.

Amkan wis sin yuwey-it usaru n « Sonita » n temseḍrut tiṛanit Boukechari, d asaru aydeg turem ad tesɛeddi izen n weɣref aṣeḥrawi i tmetti tiṛanit yernu ad tezreɛ deg umaḍal.

Amkan wis kraḍ yuwey-it usaru n « El-Ghorba » ay d-iga Uɣerbaz Aṣeḥrawi n Ssinima, yernu yesskanay-d tilawt n tudert taṣeḥawit ama seg yidis n tsertit, n tmetti d wuguren ilsanen, ma d amkan wis 4 iṣaḥed asaru n « Kharedj El-Itar » (Beṛṛa i Ukatar) n yemseḍru afalesṭini Riham Ghazali ay d-yessawlen ɣef tudert n tmeṭṭut deg tesfift n Ɣezza.

Tfuk Tfaska-a ass n ssebt tameddit s weḥdaṛ n uneɣlaf amenzu n Uneẓruf Utrim, Abdelkader Taleb-Omar d tmagliwin (wufud) n yidisan ay yettekkan.