Asebter amenzawi

Irmuden n temkarḍiyin tinagdudin d yimezgunen imnaḍanen xuṣṣen (aneɣlaf)

LEZZAYER TAMANEɣT– Yenna-d uneɣlaf n yedles dakken ur as-yeɛjib wermud (nacaṭ) n temkarḍiyin tinagdudin d yimezgunen imnaḍanen ay yessefken ad ilin reẓmen ugar ɣef twennaḍt tuffiɣt yernu ad ssemyuddsen irmuden-nsen d wid n yeɣsuren idelsanen, isegmanen, iẓuranen d wid n ttawilat n yisalan.

Mass Mihoubi ay yesselwin tiɣimit n umahil d yinemhalen n temkarḍiyin d yimezgunen, yenna-d dakken iɣsuren-a yessefk ad reẓmen ɣef twennaḍt tanmettit yernu ad ttgen izwuren (mubadarat) i wezraɛ n yedles deg tmetti.

Yesḥassef imi ala 70.000 n yemdanen ay yessaggzen iman-nsen deg 600 n temkarḍiyin tinagdudin, yernu yenna-d dakken amḍan-a ixuṣṣ aṭas.

Ixebber-d uneɣlaf n yedles dakken timkarḍiyin-a sɛant azal n 2 n yimelyunen n yedlisen, maca yesḥassef imi attekki n uɣarim (muwaṭin) yuweḍ kan ɣer 0,05% yernu ur d-yettakf tugna yelhan i tɣuri.

Yessefk ad alsent temkarḍiyin tamuɣli deg tuɣdaḍt-nsent (muhimma) yernu ad reẓment tiwwura-nsent ɣef tallunt tasegmant, ɣef wakken ay d-iwekked Mass Mihoubi ay d-yernan dakken yessefk ad sɛun yibalmuden tikarḍiwin n uttekki baṭel deg temkarḍiyin am wakken ara tili tsuddest (istratiǧiyya) tamellilt i wejbad n yimeɣriyen ɣer temkarḍiyin. Ɣef umedya, yessumer-d ad sɛunt temkarḍiyin ideggen n Internet am wakken ara d-nadint ɣef ttawilat ayyes ara d-rebḥent idrimen i uqabel n umeṣruf-nsent.