Asebter amenzawi

Imenɣi mgal wejṛad: timlilit taɣlifant n tmura n Lmeɣreb d Ssaḥel ass n ttlata deg Lezzayer

LEZZAYER TAMANEɣT – Timlilit taɣlifant tis snat n yimenɣi mgal wejṛad n tmura tifriqiyin n Tesmilt n Yimenɣi Mgal Wejṛad Amḥuǧ deg Temnaḍt Tutrimt ad d-tili ass n ttlata deg Lezzayer, ɣef wakken ay d-yenna welɣu (bayan) n weɣlif n tkerrazt.

Timlilit-a taɣlifant yessuddes-itt weɣlif n tkerrazt s wemɛawen d Tesmilt n Yimenɣi Mgal Wejṛad, yernu tesɛa azal d ameqran i ukemmel n tsuddest (istratiǧiyya) n yimenɣi n uḥezzeb deg temnaḍt-a, acku d tikkelt tis snat aydeg ara tettwassuddes deg tallit aydeg ur d-yeẓdim wejṛad, ɣef wakken ay d-yenna welɣu-a.

Amyager-a ad ttekkint deg-s acḥal n tmura, gar-asent Burkina Faso, Libya, Mali, Meṛṛuk, Muriṭanya, Nijir, Sinigal, Čad d Tunes.

Ass n letniyen, 24 Tubeṛ, ad d-tili temlilit n ussewjed aydeg ara ttekkin yimazzayen (xubara’) n yimenɣi mgal wejṛad n tmura ay yettekkan deg Tesmilt-a, ɣef wakken ay d-nnan.

Tasmilt n Yimenɣi Mgal Wejṛad tennulfa-d deg 2002 yernu iswi-nnes agejdan d assemyuddes (tansiq) n wussisen i yimenɣi mgal wejṛad deg tmura ay yettekkan deg-s.

Iswi niḍen netta d asmal n unadi d ussileɣ (takwin) ama daxel tmura-a, ama deg temnaḍt, ama deg wezɣar i lmend n uḥezzeb d yimenɣi mgal wejṛad amḥuǧ deg Tefriqt n Utaram d Tefriqt n Ugafa-Utrim.