ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⵎⴻⵏⵖⵉ ⵎⴳⴰⵍ ⵓⴽⴻⵏⵙⵉⵔ: 2000 ⵏ ⵜⵙⴻⴷⵏⴰⵏ ⴰⵔⴰ ⵢⴻⵜⵜⴻⴽⴽⵉⵏ ⴰⵙⵙ ⵏ ⵍⵊⴻⵎⵄⴰ ⴷⴻⴳ ⵜⴻⵎⵙⵉⵣⵣⴻⵍⵜ ⴷⴻⴳ ⵓⵙⵓⴷⴷⵉⵙ ⵏ 5 ⵢⵓⵍⵢⵓ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵓⴳⴰⵔ ⵏ 2.000 ⵏ ⵜⵙⴻⴷⵏⴰⵏ ⴰⵔⴰ ⵢⴻⵜⵜⴻⴽⴽⵉⵏ, ⴰⵙⵙ ⵏ ⵍⵊⴻⵎⵄⴰ, ⴷⴻⴳ ⵜⴻⵥⵔⵉⴳⵜ ⵜⵉⵙ 4 ⵏ ⵜⴻⵎⵙⵉⵣⵣⴻⵍⵜ ⵏ ⵜⵙⴻⴷⵏⴰⵏ ⴷⴻⴳ ⵓⵙⵓⴷⴷⵉⵙ (ⵎⵓⵔⴰⴽⴽⴰⴱ) ⴰⴷⴷⴰⵍⴰⵏ ⵏ 5 ⵢⵓⵍⵢⵓ, ⴷⴻⴳ ⵓⴽⴰⵜⴰⵔ ⵏ ⵜⴻⴷⵢⴰⵏⵜ ⵏ « ⵜⵓⴱⴻⵕ ⴰⵡⴻⵕⴷⵉ: ⵜⴰⵃⴻⵎⵍⴰ ⵜⴰⴳⵔⴰⵖⵍⴰⵏⵜ ⵏ ⵢⵉⵎⴻⵏⵖⵉ ⵎⴳⴰⵍ ⵓⴽⴻⵏⵙⵉⵔ ⵏ ⵢⴻⴷⵎⴰⵔⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵢⴻⵎⵙⵓⴷⴷⵙⴻⵏ ⵏ ⵜⴻⵎⵙⵉⵣⵣⴻⵍⵜ-ⴰ.

ⵔⵏⴰⵏⵜ ⵜⴻⵎⵜⵜⴻⴽⴽⵉⵢⵉⵏ, ⴰⵙⴻⴳⴳⴰⵙ-ⴰ, ⵙ 300 ⵏ ⵜⵙⴻⴷⵏⴰⵏ ⵖⴻⴼ ⵍⴻⵃⵙⴰⴱ ⵏ ⵜⴻⵥⵔⵉⴳⵜ ⵜⴰⵎⴻⵣⵡⴰⵔⵓⵜ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ ⴰⵙⵙ ⵏ ⵍⴰⵕⴻⴱⵄⴰ ⵎⴰⵙⵙⴰ ⴽⴻⵜⵜⴰⴱ ⵀⴰⵎⵉⴷⴰ, ⵜⴰⵙⴻⵍⵡⴰⵢⵜ ⵏ ⵜⵉⴷⴷⵓⴽⵍⴰ ⵏ « ⴻⵍ ⴰⵎⴻⵍ » ⵉ ⵜⴰⵍⵍⴰⵍⵜ ⵏ ⵢⴻⵎⴷⴰⵏⴻⵏ ⴰⵢ ⵢⵓⴹⵏⴻⵏ ⴰⴽⴻⵏⵙⵉⵔ. ⴷ ⵜⵉⴷⴷⵓⴽⵍⴰ-ⴰ ⴰⵢ ⵢⴻⵙⵙⵓⴷⴷⵙⴻⵏ ⵜⵉⵎⵙⵉⵣⵣⴻⵍⵜ-ⴰ ⵙ ⵡⴻⵎⵢⴰⵍⴻⵍ (ⵜⴰⵄⴰⵡⵓⵏ) ⴷ ⵜⴼⵉⴷⵉⵕⴰⵍⵉⵜ ⵜⴰⴷⵣⴰⵢⵔⵉⵜ ⵏ ⵜⴰⵜⵍⵉⵜⵉⵜ.

ⵜⴰⴷⵢⴰⵏⵜ-ⴰ ⴰⵢ ⴷ-ⵢⴻⵜⵜⵓⵖⴰⵍⴻⵏ ⵢⴰⵍ ⴰⵙⴻⴳⴳⴰⵙ ⵉⵙⵡⵉ-ⵏⵏⴻⵙ ⴷ ⴰⵙⵙⴻⵏⴼⴰⵍⵉ (ⵜⴰⵄⴱⵉⵔ) ⵏ ⵜⴻⵎⵙⴻⵜⵍⴻⵍⵜ (ⵜⴰⴹⴰⵎⵓⵏ) ⴷ ⵜⵙⴻⴷⵏⴰⵏ ⴰⵢ ⵢⵓⴹⵏⴻⵏ ⴰⴽⴻⵏⵙⵉⵔ ⴷⴻⴳ ⵍⴻⵣⵣⴰⵢⴻⵔ, ⵍⴰⴷⵖⴰ ⵢⴰⵍ ⴰⵙⴻⴳⴳⴰⵙ, 11.000 ⵏ ⵍⵉⵃⴰⵍⴰⵜ ⵜⵉⵎⴰⵢⵏⵓⵜⵉⵏ ⵏ ⵓⴽⴻⵏⵙⵉⵔ ⴰⵢ ⴷ-ⵢⴻⵜⵜⵉⵍⵉⵏ ⴷⴻⴳ ⵍⴻⵣⵣⴰⵢⴻⵔ.

ⵜⴻⵖⵙ ⵜⵉⴷⴷⵓⴽⵍⴰ-ⴰ, ⵙ ⵜⵙⵓⴷⴷⴻⵙⵜ-ⵏⵏⴻⵙ (ⵉⵙⵜⵔⴰⵜⵉⴵⵉⵢⵢⴰ) ⴰⴷ ⵜⴻⵙⵙⴻⴱⵖⴻⵙ ⴰⴷⴷⴰⵍ ⴰⵢ ⵢⴻⵙⵙⴻⵏⵇⴰⵙⴻⵏ ⴰⵎⵉⵀⵉ ⵏ ⵡⴰⴹⴹⴰⵏ ⵏ ⵓⴽⴻⵏⵙⵉⵔ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.

ⵖⴻⴼ ⵍⴻⵃⵙⴰⴱ ⵏ ⵢⵉⵡⴻⵜ ⵏ ⵜⴻⵣⵔⴰⵡⵜ (ⴷⵉⵔⴰⵙⴰ) ⵜⴰⵎⴰⵔⵉⴽⴰⵏⵉⵜ, ⴰⴷⴷⴰⵍ ⵢⴻⵜⵜⴻⴽⴽⴰⵢ ⴷⴻⴳ ⵓⵙⵙⴻⵏⵇⴻⵙ ⵏ ⵡⴰⴹⴹⴰⵏ ⵏ ⵓⴽⴻⵏⵙⵉⵔ ⵙ 38%, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.

ⵜⴻⵙⵙⴰⵡⴻⵍ-ⴷ ⵎⴰⵙⵙⴰ ⴽⴻⵜⵜⴰⴱ, ⴷⴰⵖ, ⵖⴻⴼ ⵓⵜⵜⴻⴽⴽⵉ-ⵏⵏⴻⵙ, ⵙ ⵡⴻⵎⵢⴰⵍⴻⵍ ⴷ ⵡⴻⵖⵍⵉⴼ ⵏ ⵜⴷⴰⵡⵙⴰ (ⵚⵉⵃⵃⴰ), ⴷⴻⴳ ⵜⴻⵎⵀⴻⵍⵜ (ⵄⴰⵎⴰⵍⵉⵢⵢⴰ) ⵏ ⵡⴻⴽⵛⴰⴼ ⴰⵣⵉⴽⴰⵏ ⵏ ⵓⴽⴻⵏⵙⵉⵔ ⵏ ⵢⴻⴷⵎⴰⵔⴻⵏ ⵙ ⵜⵉⴳⴳⴻⵜ ⵜⴰⵣⵉⵔⴰⵣⵜ ⴰⵢ ⵉⵄⴻⴷⴷⴰⵏ ⵢⴰⴳⵉ ⵖⴻⴼ 13 ⵏ ⵜⵡⵉⵍⴰⵢⵉⵏ ⵉ ⵡⴻⵙⵃⵓⵍⴼⵓ ⵖⴻⴼ ⵡⴰⵣⴰⵍ ⵏ ⵡⴻⴽⵛⴰⴼ-ⴰ.