ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵎⵓⵔⴰ ⵜⵉⵏⴰⵔⴰⴳⵉⵏ ⵏ ⵍⵉⴱⵢⴰ ⵓⵍⵙⴻⵏⵜ ⵡⴻⴽⴽⴷⴻⵏⵜ-ⴷ ⴰⴱⴷⴰⴷ-ⵏⵙⴻⵏⵜ ⵖⴻⵔ ⵢⵉⴷⵉⵙ ⵏ ⵓⵙⴻⵇⵇⴰⵎⵓ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ
ⵏⵉⴰⵎⴻⵢ – ⵓⵍⵙⴻⵏⵜ ⵡⴻⴽⴽⴷⴻⵏⵜ-ⴷ ⵜⵎⵓⵔⴰ ⵜⵉⵏⴰⵔⴰⴳⵉⵏ ⵏ ⵍⵉⴱⵢⴰ, ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵏⵉⴰⵎⴻⵢ, ⴰⴱⴷⴰⴷ-ⵏⵙⴻⵏⵜ ⵖⴻⵔ ⵢⵉⴷⵉⵙ ⵏ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴷⴻⴳ ⵍⵉⴱⵢⴰ, ⵢⴻⵔⵏⵓ ⵓⵍⵙⴻⵏ-ⴷ ⵉ ⵜⵓⴹⴹⴼⴰ-ⵏⵙⴻⵏ ⴷⴻⴳ ⵓⴽⴰⵍⴰ (ⵎⴰⵙⴰⵔ) ⴰⵙⴻⵔⵜⴰⵏ ⴰⵢ ⴷ-ⴱⵏⴰⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ.
ⴷⴻⴳ ⵜⴳⴰⵔⴰ ⵏ ⵜⴻⵎⵍⵉⵍⵉⵜ ⵜⵉⵙ 9 ⵏ ⵢⵉⵏⴻⵖⵍⴰⴼⴻⵏ ⵏ ⵢⵉⵡⴻⵥⵍⴰ ⵏ ⵡⴻⵣⵖⴰⵔ ⵏ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⴵⴰⵔⴰ) ⵏ ⵍⵉⴱⵢⴰ, ⵓⵍⵙⴻⵏ ⵡⴻⴽⴽⴷⴻⵏ-ⴷ ⵢⴻⵎⵜⵜⴻⴽⴽⵉⵢⴻⵏ, ⴷⴻⴳ ⵢⵉⵡⴻⵏ ⵏ ⵡⴻⵍⵖⵓ (ⴱⴰⵢⴰⵏ) ⴰⵏⴻⴳⴳⴰⵔⵓ « ⵜⵓⴹⴹⴼⴰ-ⵏⵙⴻⵏ ⴷⴻⴳ ⵓⴽⴰⵍⴰ ⴰⵙⴻⵔⵜⴰⵏ ⴰⵢ ⴷ-ⴱⴷⴰⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⴼⴻⵔⵔⵓ ⴰⵏⴻⴳⴳⴰⵔⵓ ⵢⴻⵔⵏⵓ ⴷ ⴰⴷⵓⵎⴰⵏ ⵙ ⵓⵙⵙⴻⴼⵄⴻⵍ ⵏ ⵡⴻⵎⵜⴰⵡⴰ ⴰⵙⴻⵔⵜⴰⵏ ⴰⵍⵉⴱⵉ, ⴷ ⵡⴻⴱⴷⴰⴷ-ⵏⵙⴻⵏ ⵖⴻⵔ ⵢⵉⴷⵉⵙ ⵏ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ».
ⵉ ⵍⵎⴻⵏⴷ ⵏ ⵡⴰⵢⴰ, ⵉⵏⴻⵖⵍⴰⴼⴻⵏ ⵏ ⵢⵉⵡⴻⵥⵍⴰ ⵏ ⵡⴻⵣⵖⴰⵔ ⵏ ⵜⵎⵓⵔⴰ ⵜⵉⵏⴰⵔⴰⴳⵉⵏ ⵏ ⵍⵉⴱⵢⴰ ⵙⴱⴻⵖⵙⴻⵏ ⴰⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⴰⴽⴽⴻⵏ « ⴰⴷ ⴷ-ⵢⴻⵙⵙⵉⵍⴻⵖ ⴰⵏⴰⴱⴰⴹ ⵏ ⵡⴻⵎⵙⴻⴼⵀⴰⵎ ⴰⵖⴻⵍⵏⴰⵡ ⴰⵎⴻⵇⵔⴰⵏ, ⴷ ⵡⵉⵏ ⴰⵔⴰ ⴷ-ⵢⴻⴳⴳⴻⵏⵙⴻⵙⴻⵏ ⴰⴽⴽ ⵉⵖⴰⵍⵍⴻⵏ ⵉⵙⴻⵔⵜⴰⵏⴻⵏ ⵏ ⵜⵎⵓⵔⵜ », ⴰⵎ ⵡⴰⴽⴽⴻⵏ ⴰⵢ ⴷ-ⴳⵔⴻⵏ ⵜⵉⵖⵔⵉ ⵉ ⵜⴻⵅⵅⴰⵎⵜ ⵏ ⵢⵉⴳⴻⵏⵙⴰⵙⴻⵏ (ⵎⵓⵎⴰⵜⵜⵉⵍⵉⵏ) ⴰⴷ ⴰⵙ-ⴼⴽⴻⵏ, ⵡⴰⵔ ⵍⴻⵄⴹⵉⵍ, ⵍⴰⵎⴰⵏ-ⵏⵙⴻⵏ ⵙ ⵓⵇⴰⴷⴻⵔ ⵏ ⵢⵉⵃⴻⵣⵣⵉⴱⴻⵏ ⵏ ⵡⴻⵎⵜⴰⵡⴰ ⴰⵙⴻⵔⵜⴰⵏ ⵏ 17 ⴷⵓⵊⴻⵎⴱⴻⵕ 2015.
ⴰⵜⵜⴻⴽⴽⵉ ⵏ ⵡⴰⴽⴽ ⵉⴷⵉⵙⴰⵏ ⵏ ⵜⵎⴻⵜⵜⵉ ⴷ ⵡⴰⴽⴽ ⵉⵎⴻⴳⴳⵉⵢⴻⵏ (ⴼⴰⵄⵉⵍⵉⵏ) ⴷ ⵜⴻⵎⵏⴰⴹⵉⵏ ⵜⵉⵍⵉⴱⵉⵢⵉⵏ ⵢⴻⵙⵄⴰ ⴰⵣⴰⵍ ⴷ ⴰⵎⴻⵇⵔⴰⵏ ⵉ ⵓⵙⵙⴻⵔⴱⴻⵃ ⵏ ⵓⴽⴰⵍⴰ ⴰⵙⴻⵔⵜⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵡⴻⵍⵖⵓ-ⵏⵏⵉ ⴰⵏⴻⴳⴳⴰⵔⵓ.
