Asebter amenzawi

Sidi Belɛebbas: tafaska tadigant n ṛṛay ad d-tili gar 3 d 5 Wamber ay d-yetteddun

SIDI BELƐEBBAS – Ad d-tili teẓrigt tis 9 n tfaska tadigant n tezlit n ṛṛay gar 3 d 5 Wamber ay d-yetteddun deg Sidi Belɛebbas, ɣef wakken ay d-yenna umasay n tedyant-a, amẓawan Lotfi Attar, deg yiwen n usarag n tɣemsa.

Ad d-tili teẓrigt-a (ṭabɛa) deg wexxam n yedles n « Kateb-Yacine », yernu maci, am deg yiseggasen yezrin, deg usarir (malɛab) n « 3 n Waytmaten Amarouche ».

Ala icennayen idiganen (maḥalliyyin) d kra n yetran n Wehṛan ara yettekkin, ɣef wakken ay d-yenna Lotfi Attar, ay d-yernan dakken smenyafen ad tettunefk tegnit i yinaẓuren idiganen akken ad d-banen sdat wegdud.

Gar yicennayen ay yettwassihlen ad ttekkin, yella Ccab Mohamed Abbassi, Kader Japoni, Ccab Abes, Kadir Sghir, Ccix Naam, Ccab Yacine, Ccix Hattab, tagrawt n Raina Rai, Hakim Salhi d waṭas n wiyaḍ.

Yenna-d Attar dakken ḥazen-d 15 n yimelyunen n yidinaṛen i ussidrem n tfaska-a ay yettwawexxren snat n tikkal.

Deg wayen yerzan aṣennef n uẓawan n ṛṛay deg Unesco s yisem-nnes d tigemmi tarangant tanmaḍalt, yenna-d Attar dakken ssersen akaram (milaf) i ussuter n waya ɣer Unesco i lmend n weḥraz n tẓuri-a ay yellan d aḥric seg tgemmi taɣelnawt.