Asebter amenzawi

Tamesrit Tagraɣlant n Wedlis n 2016: tuzwirt i yimeskaren idzayriyen

LEZZAYER TAMANEɣT – Ad tettunefk tuzwirt i yimeskaren (mu’allifin) idzayriyen deg Tmesrit Tagraɣlant n Wedlis tis 21 n Lezzayer Tamaneɣt (27 Tubeṛ-5 Wamber), yernu ad d-tili daɣ cwiṭ n tmerniwt deg yemzikknen iwerdaniyen, ɣef wakken ay d-yenna, ass n ssebt deg Lezzayer unemhal n tmesrit-a, Hamidou Messaoudi.

Taẓrigt-a (ṭabɛa) ad ttekkin deg-s 671 n yimaẓragen iwerdaniyen (yili ilindi ttekkan kan 620), yernu seg gar 100 n yimeskaren ay d-yettwaɛerḍen, 60 seg-sen d idzayriyen, ɣef wakken ay d-yenna Mass Messaoudi deg yiwen n usarag kra n wussan uqbel ma tettwarẓem tmesrit.

Seg gar yemttekkiyen idzayriyen d yiwerdaniyen, ad ttekkin Waciny Laaredj, Lahbib Sayeh d Amine Zaoui (Lezzayer), Edwy Plenel d Jean-Christophe Rufin (Fṛansa), Costa-Gavras (Legrig/Fṛansa), Rabai Al-Madhoun (Falesṭin), Vera Kitova (Bulgaṛya) d Dany Laferriere (Haiti/Kanada).

Mass Messaoudi, ay ixeddmen daɣ d anemhal amatu n Teṛmist Taɣelnawt n Tẓuriyin Tudlifin (ENAG), yenna-d dakken tuzwirt tettunefk, am leɛwayed, i yedlisen ussnanen d yesdawanin d yedlisen n yilemẓiyen.

Mi yettwatter ɣef wegdal n kra n yedlisen, yenna-d dakken yella-d ukukru deg wayen yerzan idlisen ay iḥuzan tanaya (siyada) taɣelnawt d ddyanat, wid ay yessebɣasen takriḍt (ɛunf) neɣ cekkṛen-d taremmiɣt, am wakken ay d-yerna dakken assenzi n yedlisen s ujemmal yettwagdel akk yernu s kra n win ara yeffɣen i webrid deg temsalt-a ur yettekkay deg teẓrigin ay d-yetteddun.