ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
25.000 ⵏ ⵢⵉⵏⴻⵍⵎⴰⴷⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⴷ-ⵢⵓⵡⵢⴻⵏ ⵉⴳⴻⵔⵜⴷⴰⵙⴻⵏ ⵙⴻⴳ ⵜⴻⵙⴷⴰⵡⵉⵢⵉⵏ ⵜⵉⴷⵣⴰⵢⵔⵉⵢⵉⵏ (ⵀⴰⴷⵊⴰⵔ)
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵜⴻⵙⵙⵓⴷⴷⴻⵙ ⵜⵎⴰⵀⴻⵍⵜ ⵜⴰⴼⴰⵍⴻⵙⵟⵉⵏⵉⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⵜⴰⴼⵓⴳⵍⴰ ⵏ ⵜⴻⵊⵎⵉⵍⵜ ⵉ ⵢⵉⵏⴻⵍⵎⴰⴷⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⴷ-ⵢⵓⵡⵢⴻⵏ ⵉⴳⴻⵔⴷⴰⵙⴻⵏ ⵙⴻⴳ ⵜⴻⵙⴷⴰⵡⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⴷⴻⴳ 2016 ⵙ ⵡⴻⵃⴷⴰⵕ ⵏ ⵓⵏⴻⵖⵍⴰⴼ ⵏ ⵡⴻⵍⵎⵓⴷ ⵉⵎⵉⵏⴻⴳ, ⵜⴰⵀⴰⵔ ⵀⴰⴷⵊⴰⵔ, ⵢⴻⵔⵏⵓ ⵢⴻⵛⴽⴻⵕ-ⴷ ⴰⵣⵡⵓⵔ-ⴰ (ⵎⵓⴱⴰⴷⴰⵔⴰ).
ⵜⴰⴼⵓⴳⵍⴰ-ⴰ ⵜⴻⵜⵜⵡⴰⵙⵙⵓⴷⴷⴻⵙ ⴷⴻⴳ « ⵜⵣⴻⵖⵖⴰ ⵜⴰⵣⴻⵡⵡⴰⵖⵜ » ⵏ ⵜⴻⵎⴽⴰⵔⴹⵉⵜ ⵜⴰⵖⴻⵍⵏⴰⵡⵜ ⵏ ⵍⵃⴰⵎⵎⴰ (ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ), ⵢⴻⵔⵏⵓ ⵃⴻⴷⵕⴻⵏ ⴷⴻⴳ-ⵙ, ⵖⴻⵔ ⵢⵉⴷⵉⵙ ⵏ ⵡⴻⵏⵎⴰⵀⴰⵍ (ⵙⴰⴼⵉⵔ) ⴰⴼⴰⵍⴻⵙⵟⵉⵏⵉ ⴷⴻⴳ ⵍⴻⵣⵣⴰⵢⴻⵔ, ⵍⵧⵓⴰⵉ ⴰⵉⵙⵙⴰ, ⵉⴳⴻⵏⵙⴰⵙⴻⵏ ⵉⴷⵉⵒⵍⵓⵎⴰⵜⵉⵢⴻⵏ ⵏ ⵜⵎⵓⵔⴰ ⵜⴰⵄⵕⴰⴱⵉⵏ ⴰⵢ ⵢⴻⵍⵍⴰⵏ ⴷⴻⴳ ⵍⴻⵣⵣⴰⵢⴻⵔ. ⴷⴻⴳ ⵜⴼⵓⴳⵍⴰ-ⴰ, ⵔⵔⴰⵏ ⵜⴰⵊⵎⵉⵍⵜ ⵉ 150 ⵏ ⵢⵉⵏⴻⵍⵎⴰⴷⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⴷ-ⵢⵓⵡⵢⴻⵏ ⵉⴳⴻⵔⴷⴰⵙⴻⵏ-ⵏⵙⴻⵏ ⴷⴻⴳ ⵍⴻⵣⵣⴰⵢⴻⵔ ⴷⴻⴳ ⵜⵎⴻⵣⵣⵓⴳⵉⵏ (ⵉⵅⵜⵉⵚⴰⵚⴰⵜ) ⵢⴻⵎⴳⴻⵔⵔⴰⴷⴻⵏ ⴷⴻⴳ ⵓⵙⴻⴳⴳⴰⵙ ⵏ 2016.
ⵉ ⵍⵎⴻⵏⴷ ⵏ ⵡⴰⵢⴰ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵡⴻⵍⵎⵓⴷ ⵉⵎⵉⵏⴻⴳ ⴷⴰⴽⴽⴻⵏ ⵍⴻⵣⵣⴰⵢⴻⵔ ⵜⴻⵜⵜⵄⴰⵡⴰⴷ ⵜⴻⵜⵜⵡⴻⴽⴽⵉⴷ-ⴷ ⴰⴷⴷⵓⴷ-ⵏⵏⴻⵙ ⵓⵔ ⵢⴻⵜⵜⴱⴻⴷⴷⵉⵍⴻⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵎⴻⵏⵖⵉ ⴰⴼⴰⵍⴻⵙⵟⵉⵏⵉ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷⴰⴽⴽⴻⵏ ⴰⵎⴹⴰⵏ ⵏ ⵢⵉⵏⴻⵍⵎⴰⴷⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴷⴻⴳ ⵜⴻⵙⴷⴰⵡⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⴷ ⵏⴻⵜⵜⴰ ⴰⵢ ⴷ ⴰⵎⴹⴰⵏ ⴰⵎⴻⵇⵔⴰⵏ ⴰⴽⴽ ⵏ ⵢⵉⵏⴻⵍⵎⴰⴷⴻⵏ ⴷⴻⴼⴼⵉⵔ ⵡⴻⵎⴹⴰⵏ ⵏ ⵢⵉⵏⴻⵍⵎⴰⴷⴻⵏ ⵉⴷⵣⴰⵢⵔⵉⵢⴻⵏ.
« ⴰⵎⴹⴰⵏ ⵏ ⵢⵉⵏⴻⵍⵎⴰⴷⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⴷ-ⵢⵓⵡⵢⴻⵏ ⴰⴳⴻⵔⴷⴰⵙ ⵙⴻⴳ ⵜⴻⵙⴷⴰⵡⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⵢⵓⵡⴻⴹ ⵖⴻⵔ 25.000 ⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵀⴰⴷⵊⴰⵔ.
« ⵙⴻⴳ ⵡⴰⵙⵎⵉ ⴰⵢ ⵜⵓⵡⴻⵢ ⴰⵣⴰⵔⵓⴳ (ⵉⵙⵜⵉⵇⵍⴰⵍ), ⵍⴰ ⵜⴻⵜⵜⴻⴷⴷⵓ ⵍⴻⵣⵣⴰⵢⴻⵔ ⵉ ⵢⵉⵏⴻⵍⵎⴰⴷⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴰⴽⴽⴻⵏ ⴰⵢ ⵜⴻⵜⵜⴻⴷⴷⵓ ⵉ ⵢⵉⴷⵣⴰⵢⵔⵉⵢⴻⵏ ⴷⴻⴳ ⵡⴰⴽⴽ ⵉⵏⵓⵔⴰⵔ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴷⴰⴼ ⵖⴻⵔ ⵜⴻⵙⴷⴰⵡⵉⵢⵉⵏ ⵏⴻⵖ ⴰⵎⵎⴻⵕⴽⵉ ⵖⴻⵔ ⵜⴻⵙⴷⴰⵡⵉⵜ ⴰⵢ ⴰⵙⴻⵏ-ⵢⴻⵀⵡⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ.
