Asebter amenzawi

Tamɣunt 1ut n Mobilis/USM Lezzayer: Raouf Benguit ad yurar mgal NA Ḥusin Day

LEZZAYER TAMANEɣT– Alemmas n wenrar n USM Lezzayer, Raouf Benguit, ay iḥebsen urar azal n snat n ledwaṛ aya ɣef lǧal n tyita deg tweṭzit, yuɣal-d ɣer wesleɣmu d tegrawt-nnes deg usarir n Omar-Hamadi (Buluɣin), ɣef wakken ay d-tenna teɣlamt-a n Lezzayer Tamaneɣt.

ɣef leḥsab n teɣlamt, Benguit yezmer daɣ ad yurar deg wemkan n wemdeffir imidis yernu ad yezmer ad yexdem d wesleɣmay Paul Put akken ad iheyyi iman-nnes i temlilit n uderbi ara turar USM Lezzayer mgal NA Ḥusin Day ass n lexmis ay d-yetteddun.

Yuɣ-itent Benguit deg yiwet n temlilit ay texṣer USM Lezzayer mgal CA Tabatent (2 ɣer 1) deg wass wis 9 n telɣuɣa n Lezzayer deg usarir n Seffouhi deg Tbatent. D aya ay t-yeǧǧan ur iḥeddeṛ deg snat n temliliyin tineggura ay turar teɣlamt-nnes, tin ay d-yellan mgal Lḥeṛṛac (0-2) d tin ay d-yellan mgal MC Wehṛan (0-0).

USM Lezzayer ad temmager NA Ḥusin Day ass n lexmis ɣef tis 5:00 n tmeddit deg usarir n 5 Yulyu (Lezzayer Tamaneɣt) deg yiwet n temlilit deg ukatar n wass wis 12 n telɣuɣa n Temɣunt 1ut n Mobilis.

Deg wass wis 11 n Telɣuɣa, teḍḍef USM Lezzayer amkan amezwaru d MC Wehṛan s 20 n tenqiḍin, maca Muludeyya n Lezzayer mazal tettwalas timlilit mgal MO Bgayet, d tin ara d-yilin ass n letniyen 5 Dujembeṛ ɣef tis 4:00 n tmeddit deg usarir n Tdukli Tamɣarbit deg Bgayet.