ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵟⵟⴰⵔⴻⴼ: ⴰⵀⵉⵍ ⴷ ⴰⵎⴻⵇⵔⴰⵏ ⵉ ⵓⵙⵙⴻⵜⵔⴻⵔ ⵏ ⵢⴻⴱⵔⵉⴷⴻⵏ (ⴰⵎⴰⵙⴰⵢ)

ⵟⵟⴰⵔⴻⴼ – ⵍⴰ ⴷ-ⵢⴻⵜⵜⵉⵍⵉ ⵓⵙⵙⴻⴹⵔⵓ (ⵉⵏⴵⴰⵣ) ⵏ ⵢⵉⵡⴻⵏ ⵏ ⵡⴰⵀⵉⵍ ⵏ ⵓⵚⴻⴳⴳⴻⵎ ⴷ ⵓⵙⵙⴻⵜⵔⴻⵔ ⵏ ⵓⵥⴻⴹⴹⴰ ⵏ ⵢⴻⴱⵔⵉⴷⴻⵏ ⴷⴻⴳ ⵜⵖⵉⵡⴰⵏⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵟⵟⴰⵔⴻⴼ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ, ⴰⵙⵙ ⵏ ⵜⵜⵍⴰⵜⴰ, ⵜⵎⴻⵀⵍⴰ ⵜⴰⴷⵉⴳⴰⵏⵜ ⵏ ⵢⵉⵎⴰⵀⵉⵍⴻⵏ (ⴰⵛⵖⴰⵍ) ⵉⵏⴰⴳⴷⵓⴷⴻⵏ.

ⴷⴻⴳ ⵓⴽⴰⵜⴰⵔ ⵏ ⵡⴰⵀⵉⵍ ⴰⵙⵎⴰⴷⴰⵏ (ⵎⵓⵜⴰⵎⵎⵉⵎ) ⴰⵢⵙⴻⴳ ⴰⵢ ⴷ-ⵜⴻⵙⴼⴰⵢⴷⵉ ⵜⵡⵉⵍⴰⵢⵜ-ⴰ (ⵢⴻⵔⵏⵓ ⵢⴻⴱⴷⴰ-ⴷ ⴷⴻⴳ 2015), ⴰⵚⴻⴳⴳⴻⵎ ⵏ ⵢⴻⴱⵔⵉⴷⴻⵏ ⴷ ⵡⵉⵏ ⴰⵔⴰ ⴷ-ⵢⴻⵍⵀⵓⵏ ⵙ 3 ⵏ ⵢⴻⴱⵔⵉⴷⴻⵏ ⵉⵏⵖⵉⵡⴰⵏⴻⵏ (ⴱⴰⵍⴰⴷⵉⵢⵢⴰ) ⴷⴻⴳ ⵜⵖⵉⵡⴰⵏⵜ ⵏ ⴱⵓⴳⵓⵙ (ⵙ ⵜⴻⵖⵣⴻⴼ ⵏ 9 ⵏ ⵢⵉⴽⵉⵍⵓⵎⵉⵜⵔⴻⵏ), ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵔⴰⴱⴰⵀ ⵙⴰⵔⵉ ⴰⵢ ⴷ-ⵢⴻⵔⵏⴰⵏ ⴷⴰⴽⴽⴻⵏ ⵉⴼⵓⴽ ⵓⵚⴻⴳⴳⴻⵎ ⵏ ⵡⴻⵃⵔⵉⵛ ⵙⴻⴳ ⵢⴻⴱⵔⵉⴷⴻⵏ-ⴰ ⵢⴻⵔⵏⵓ ⵎⴰⵣⴰⵍ ⵍⴰ ⵢⴻⵜⵜⴽⴻⵎⵎⵉⵍ ⵓⵚⴻⴳⴳⴻⵎ ⵏ ⵡⴻⵃⵔⵉⵛ ⵡⵉⵙ ⵙⵉⵏ. ⴰⵚⴻⴳⴳⴻⵎ-ⴰ ⴰⴷ ⴷ-ⵢⴻⵙⵇⴰⵎ 400 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ.

ⵢⴻⵏⵏⴰ-ⴷ ⵓⵎⴰⵙⴰⵢ (ⵎⴰⵙ’ⵓⵍ) ⵏ ⵜⵎⴻⵀⵍⴰ-ⴰ ⴷⴰⴽⴽⴻⵏ ⴰⵛⴰⵏⵟⵉ ⵏ ⵓⵚⴻⴳⴳⴻⵎ ⵏ ⵡⴻⴱⵔⵉⴷ ⵏ ⵜⵡⵉⵍⴰⵢⵜ ⵡⵉⵙ 118 (ⵙ ⵜⴻⵖⵣⴻⴼ ⵏ 10 ⵏ ⵢⵉⴽⵉⵍⵓⵎⵉⵜⵔⴻⵏ) ⴳⴰⵔ ⵛⴻⴼⵢⴰ ⴷ ⵄⵉⵏ ⴽⴻⵕⵎⴰ, ⵢⴻⴱⴷⴰ-ⴷ ⵢⴻⵔⵏⵓ ⴰⵙⵎⵉ ⴰⵔⴰ ⵉⴼⴰⴽ, ⴰⴷ ⵉⵙⴻⵔⵔⴻⵃ ⵜⵉⴷⴷⵉⵜ ⵏ ⵜⴽⴻⵕⵕⵓⵙⵉⵏ.

ⵢⴻⵏⵏⴰ-ⴷ ⵓⵏⴻⵎⵀⴰⵍ ⵏ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ ⴷⴰⵒⵇ ⴷⴰⴽⴽⴻⵏ ⵉⵛⴰⵏⴹⵉⵢⴻⵏ ⵏ ⵓⵚⴻⴳⴳⴻⵎ ⵏ ⵡⴻⴱⵔⵉⴷ ⵏ ⵜⴻⵎⴷⵉⵏⵉⵏ ⵏ ⵍⴻⵄⵢⵓⵏ ⴷ ⵓⵎ ⵟⵟⴱⵓⵍ (ⵖⴻⴼ ⵜⵍⵉⵙⴰ ⵏ ⵜⵓⵏⴻⵙ) ⴱⴷⴰⵏ ⵢⴻⵔⵏⵓ ⴰⴷ ⴷ-ⵍⵀⵓⵏ ⵙ ⵓⵚⴻⴳⴳⴻⵎ ⵏ 4 ⵏ ⵢⵉⴽⵉⵍⵓⵎⵉⵜⵔⴻⵏ ⵙⴻⴳ-ⵙ.

ⴰⵀⵉⵍ ⴰⵙⵎⴰⴷⴰⵏ ⴰⵢⵙⴻⴳ ⴰⵢ ⴷ-ⵜⴻⵙⴼⴰⵢⴷⵉ ⵜⵡⵉⵍⴰⵢⵜ ⵏ ⵟⵟⴰⵔⴻⴼ ⴷⴻⴳ ⵡⴻⵃⵔⵉⵛ ⵏ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ ⵢⴻⵔⵣⴰ ⴷⴰⵖ ⴰⵙⵙⴻⵊⵀⴻⴷ ⵏ ⵡⴻⴱⵔⵉⴷ ⴰⵖⴻⵍⵏⴰⵡ ⵡⵉⵙ 82 ⵙ ⵜⴻⵖⵣⴻⴼ ⵏ 18 ⵏ ⵢⵉⴽⵉⵍⵓⵎⵉⵜⵔⴻⵏ, ⵢⴻⵔⵏⵓ ⵢⴻⵜⵜⵡⴰⴱⴹⴰ ⵓⵛⴰⵏⵟⵉ-ⴰ ⵖⴻⴼ ⵙⵉⵏ ⵏ ⵢⴻⵃⵔⵉⵛⴻⵏ, ⵢⵉⵡⴻⵏ ⴷ ⵡⵉⵏ ⵏ ⵡⴻⴱⵔⵉⴷ ⵙⴻⴳ ⵟⵟⴰⵔⴻⴼ ⵖⴻⵔ ⵜⴻⵎⴷⵉⵏⵜ ⵏ ⵣⵣⵉⵜⵓⵏⴰ (ⵖⴻⴼ ⵜⵍⵉⵙⴰ ⵏ ⵜⵓⵏⴻⵙ), ⵎⴰ ⴷ ⵡⴰⵢⴻⴹ ⴷ ⵡⵉⵏ ⵢⴻⵜⵜⴻⴷⴷⵓⵏ ⵙⴻⴳ ⵄⵉⵏ ⴽⴻⵕⵎⴰ ⵖⴻⵔ ⴱⵓⵃⴵⴻⵕ.