Asebter amenzawi

Iban-d « Wayyur Ameqran » deg tmura n Asya d Ugaraw Imelwi

JAKARTA– Abani n « Wayyur Ameqran » deg yiḍ n wass n letniye deg Ustṛalya yella-d d ahanay (ɛarḍ) ur yesɛin tamtilt deg 70 n yiseggasen-a ineggura yernu walan-t medden deg waṭas n temnaḍin niḍen n umaḍal, ɣef leḥsab n tnegga n NASA.

Abani n «Wayyur Ameqran » yettili-d mi ara ddukklent snat n tɣawsiwin: ayyur ummid ad d-yeɣli swaswa deg wakud aydeg ayyur yettqerrib-d aṭas akk ɣer Wakal, dɣa d aya ara yeǧǧen ayyur ad d-iban yettirriq yernu meɣɣer s wazal n 14% ɣef wakken ay yennum yettban-d, ɣef wakken ay d-tessefhem NASA.

Yuweḍ Wayyur ɣer tenqiḍt tuqribt akk ɣer Wakal ɣef tis 11:22 n tṣebḥit (s wakud n Greenwich) yernu yuɣal d ummid ɣef 1ut52 n tmeddit (s wakud n Greenwich), yernu deg wakk imukan aydeg d-yeɣli yiḍ deg wakud-nni, llan zemren medden ad t-ẓren ma yeṣfa lḥal.

Deg Sydney, d igiman (alaf) n medden ay d-yusan ɣer yiwet n teftist (caṭi’) deg wegmuḍ n temdint-a (teqreb ɣer Bondi Beach) akken ad walin « Ayyur Ameqran », ula ma yella usigna yernu yella yekkat wenẓar.

Yal tikkelt aydeg ara d-iban cwiṭ Wayyur, ad d-seffqen medden, uqbel ma yules idel-it usigna.

« Aya igerrez s tidet », ɣef wakken ay d-yenna Aidan Millar-Powell i tnegga n AFP, deg tlemmast n lɣaci yumaren deg teftist-a. Azal n 18.000 n yimarayen n tesnallunt ay d-yennan, deg useter n Facebook n Gavin McCormack, dakken ad d-asen ad ḥedṛen deg tedyant-a.

«ɣsen ad walin medden tadyant-a acku tḍerru-d tikkelt kan i 100 n yiseggasen. Ur ɣsen ad mmten war ma nnan-d ‘nwala Ayyur Ameqran’ », ɣef wakken ay d-yenna Aidan.