ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴻⵣⵣⴰⵢⴻⵔ-ⵜⴰⴳⴻⵍⴷⴰ ⵜⴰⵙⴰⵄⵓⴷⵉⵜ: ⴰⵙⵜⴻⵏⵢⵉ ⵏ ⵜⴻⵙⵎⴻⴽⵜⴰⵢⵜ ⵏ ⵡⴻⵎⵙⴻⴼⵀⴰⵎ ⴷⴻⴳ ⵡⴻⵎⵢⴰⵍⴻⵍ ⴰⵎⵙⴻⵏⵣⵉ
ⵔⵉⵢⴰⴹ– ⵙⵜⴻⵏⵢⴰⵏⵜ ⵍⴻⵣⵣⴰⵢⴻⵔ ⴷ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵔⵉⵢⴰⴹ, ⵜⴰⵙⵎⴻⴽⵜⴰⵢⵜ ⵏ ⵡⴻⵎⵙⴻⴼⵀⴰⵎ ⴷⴻⴳ ⵡⴻⵎⵢⴰⵍⴻⵍ ⴰⵎⵙⴻⵏⵣⵉ ⴷⴻⴳ ⵓⴽⴰⵜⴰⵔ ⵏ ⵜⴻⵔⵣⵉ ⵜⵓⵏⵚⵉⴱⵜ ⴰⵢ ⵉⴳⴰ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⵖⴻⴼ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ.
ⵙⴻⴳ ⵢⵉⴷⵉⵙ ⴰⴷⵣⴰⵢⵔⵉ, ⴷ ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⴷ ⵜⴻⵎⵖⵓⵏⵜ ⵜⴰⵄⵕⴰⴱⵜ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⴰⵢ ⵢⴻⵙⵜⴻⵏⵢⴰⵏ ⵜⴰⵙⵎⴻⴽⵜⴰⵢⵜ-ⴰ, ⵎⴰ ⵙⴻⴳ ⵢⵉⴷⵉⵙ ⴰⵙⴰⵄⵓⴷⵉ, ⴷ ⴰⵏⴻⵖⵍⴰⴼ ⵏ ⵜⵏⴻⵣⵣⵓⵜ ⴷ ⵓⵙⵙⴻⴼⵜⵉ, ⵎⴰⵊⴻⴷ ⴰⵍ-ⵇⴰⵙⴰⴱⵉ, ⴰⵢ ⵜⵜ-ⵢⴻⵙⵜⴻⵏⵢⴰⵏ.
ⴰⵎⵜⴰⵡⴰ-ⴰ ⵢⴻⵔⵣⴰ ⵍⴰⴷⵖⴰ ⴰⵃⵓⴷⴷⵓ ⵏ ⵢⴻⵎⵙⵓⴷⴻⵔ ⴷ ⵓⵙⵙⴻⴼⵇⴻⴷ ⵏ ⵜⵖⴰⵔⴰ ⵏ ⵙⵙⴻⵍⵄⴰ ⴷ ⵢⵉⵎⴻⵥⵍⴰ (ⵅⴰⴷⴰⵎⴰⵜ) ⴷⴻⴳ ⵓⴽⴰⵜⴰⵔ ⵏ ⵡⴻⵎⴱⴰⴷⴷⴻⵍ ⴰⵎⵙⴻⵏⵣⵉ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ.
ⴰⵎⴱⴰⴷⴷⴻⵍ ⴰⵎⵙⴻⵏⵣⵉ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ ⵢⵓⵡⴻⴹ ⵖⴻⵔ 619 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 2015. ⴰⴵⴰⵡⴻⵏ ⵉⴷⵣⴰⵢⵔⵉⵢⴻⵏ ⴽⴽⴰⵏ ⵉ 612 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ, ⵎⴰ ⴷ ⵉⵙⵙⵉⴵⵡⴻⵏ ⵉⴷⵣⴰⵢⵔⵉⵢⴻⵏ ⵖⴻⵔ ⵜⵎⵓⵔⵜ-ⴰ ⵓⵔ ⴽⴽⵉⵏ ⵉ 7 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ.
ⴰⵡⴰⵍ ⴳⴰⵔ ⵙⵏⴰⵜ-ⴰ ⵏ ⵜⵎⴰⴳⵍⵉⵡⵉⵏ (ⵡⵓⴼⵓⵇ) ⴷ ⵡⵉⵏ ⴰⵢ ⴷ-ⵉⵃⵓⵣⴰⵏ ⴰⵇⴻⵢⵢⴻⵎ ⵏ ⵡⴻⵎⵢⴰⵍⴻⵍ ⴰⵙⵉⵏⴷⵉⵙ ⴷ ⵓⵏⴰⴷⵉ ⵖⴻⴼ ⵢⴻⴱⵔⵉⴷⴻⵏ ⴰⵢ ⵉⵣⴻⵎⵔⴻⵏ ⴰⴷ ⵙⵏⴻⴼⵍⵉⵏ ⴰⵎⵢⴰⵍⴻⵍ-ⴰ ⴷⴻⴳ ⵢⵉⵏⵓⵔⴰⵔ ⵢⴻⵎⴳⴻⵔⵔⴰⴷⴻⵏ.
ⴰⴷ ⵢⴻⵜⵜⴻⴽⴽⵉ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⵙⵙ ⵏ ⵍⴰⵕⴻⴱⵄⴰ, ⴷⴻⴳ ⵢⵉⵡⴻⵏ ⵏ ⵡⴻⵏⵎⴰⴳⴻⵔ ⴰⴷⴰⵎⵙⴰⵏ ⴰⵔⴰ ⴷ-ⵢⵉⵍⵉⵏ ⵉ ⵍⵎⴻⵏⴷ ⵏ ⵓⵙⵙⴻⴱⵖⴻⵙ ⵏ ⵜⴻⵕⵎⵉⵙⵉⵏ ⵜⵉⴷⴰⵎⵙⴰⵏⵉⵏ ⵏ ⵙⵏⴰⵜ-ⴰ ⵏ ⵜⵎⵓⵔⴰ ⴰⴽⴽⴻⵏ ⴰⴷ ⵙⵏⴻⴼⵍⵉⵏⵜ ⴰⵙⵙⴻⴼⵜⵉ ⴰⵔⴰⵔⴰⵢ ⴷ ⵓⵙⵙⵓⴳⴳⴻⵜ ⵏ ⵢⴻⵣⵡⵓⵔⴻⵏ ⵏ ⵜⵉⵛⵛⵓⵔⴽⴰ.
