Asebter amenzawi

Skikda: asseftutes n yiwen n uẓeḍḍa yemmuzzgen deg wedɣal n yikaramen n lviza (taɣellist)

SKIKDA – Tettwaḍḍef yiwet n tegrawt n 6 n yemdanen yesɛan gar 25 d 38 n yiseggasen, yemmuzzgen deg wedɣal n lekwaɣeḍ n yikaramen n lviza n « Schengen ». D taferqet tadamsant d tedrimant n temsulta taɣedmant n Skikda ay igan ccɣel-a, ɣef wakken ay aɣ-d-txebber, ass n letniyen, tɣellist n twilayt.

Imdanen-a ay yettwaḍḍfen llan-d fell-asen wacḥal n yeḥtacen, yernu d ayen ay yessawḍen ɣer tuḍḍfa n umezwaru deg-sen dduṛt yezrin deg temdint n Skikda mi d-ufan ɣer-s lekwaɣeḍ ideɣlen i lmend n yikaramen n ussuter n lviza n « Schengen », ɣef wakken ay d-tenna tɣellist n twilayt, am wakken ay d-terna dakken lekwaɣeḍ-a uznen-ten ɣer umeẓlu (maṣlaḥa) ay terza temsalt akken ad ikemmel weḥtac fell-asen.

Igmaḍ n weḥtac sseknen-d dakken ameckuk (muctabah) agejdan yella ixeddem deg tneɣlusin n Internet anda ay yella ideɣɣel lekwaɣeḍ ideblanen d yibankanen d lekwaɣeḍ n umahil n teṛmisin tusligin d tnagdudin, gar-asen iselkinen n wermud n leɣrama, tisenta n twacult, tisenta tinterrasin, tisenta n lexlaṣ d yiselkinen n yimuras, ɣef wakken ay d-tenna tɣellist n twilayt.

Imeckuken-a llan sseqdace ttawilat isnatwilanen (tiknuluǧiyya) d inaẓiyen akken ad d-gen lekwaɣeḍ yernu ad ten-ssenzen i yimectura-nsen s wugar n 35.000 n yidinaṛen, yernu yekcef-d ufettec deg yexxamen-nsen dakken ffren lekwaɣeḍ udɣilen niḍen.