Asebter amenzawi

Tamsalt n tmenɣiwt n Ali Tounsi: ad yebdu ccṛeɛ ass n lḥedd s weḥdaṛ n yinagan d yimazzayen

LEZZAYER TAMANEɣT – Ad yebdu ccṛeɛ n yiɣef n tigget tagenwant n Tmehla Tamatut n Tɣellist Taɣelnawt, Aknaner Chouaib Oultache, yettwattehmen s tmenɣiwt n unemhal amatu aqbur n Tmehla-a, Ali Tounsi, ass n lḥedd deg wexxam n ccṛeɛ n tejrimin n Lezzayer Tamaneɣt, s weḥdaṛ n yinagan d yimazzayen (xubara’), ɣef wakken ay d-yenna umazday n yibugaṭuten n umetthum-a.

« Tamḥaddit ad d-tɣer i 54 n yinagan d 8 n yimazzayen umi slan deg weḥtac, am wakken ara d-ssuffɣen ttbutat uqbel ma yebda ccṛeɛ n wass n lḥedd », imi ay « yessefk waya i lmend n weḥkam s teɣdemt, ɣef wakken ay d-yenna Ukerwa Mohamed Tayeb Belaarif i Tnegga n Yisalan n Lezzayer. Abugaṭu-a d netta d yiwen seg wid ay d-yelhan s temḥaddit n umetthum ɣer yidis n Yikerwaten Mohamed Amine Sidhoum d Nora Ghaffar.

Tamḥaddit « ad d-tefk umuɣ (qa’ima) n yinagan imaynuten umi ur slin deg weḥtac », ɣef wakken ay d-yenna ubugaṭu-a ay d-yernan dakken lqanun yefka azref i waya.

Chouaib Oultache yettwacaṛeɛ ɣef « tmenɣiwt s tmeɛmada yernu s leḥsab, aneɛruḍ n tmenɣiwt d wayla n leslaḥ n tmes war ttesriḥ », ɣef leḥsab n temlilt tasemmadt n tedwilt tajrimant tis snat n 2016.

Ali Tounsi yenɣa-t umetthum Oultache ass n 25 Fuṛaṛ 2010, sakkin yeɛreḍ ad ineɣ iman-nnes deg yiwet n temlilit deg tesɣimt (maqarr) n Tmehla Tamatut n Tɣellist Taɣelnawt deg Lezzayer Tamaneɣt, ɣef wakken ay d-yenna weɣlif n yiweẓla n daxel.