ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴻⵙⵜⴻⵕⵃⴻⴱ ⵍⵉⴱⵢⴰ ⵙ ⵢⴻⴳⵎⴰⴹ ⵏ ⵜⴻⵎⵍⵉⵍⵉⵜ ⵏ ⵜⵎⵓⵔⴰ ⵜⵉⵏⴰⵔⴰⴳⵉⵏ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵜⴻⵙⵜⴻⵕⵃⴻⴱ ⵍⵉⴱⵢⴰ, ⴰⵙⵙ ⵏ ⵍⴻⵜⵏⵉⵢⴻⵏ, ⵙ ⵢⴻⴳⵎⴰⴹ ⵏ ⵜⴻⵎⵍⵉⵍⵉⵜ ⵜⵉⵙ 11 ⵏ ⵜⵎⵓⵔⴰ ⵜⵉⵏⴰⵔⴰⴳⵉⵏ ⵏ ⵍⵉⴱⵢⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵍⴻⵣⵣⴰⵢⴻⵔ ⵉ ⵓⵡⴻⴽⴽⴻⴷ ⵏ ⵜⵓⴹⴹⴼⴰ ⵏ ⵜⵎⵓⵔⴰ-ⴰ ⴷⴻⴳ ⵜⵖⴻⵍⵍⵉⵙⵜ, ⴰⵔⴽⴰⴷ ⴷ ⵜⵓⵎⵎⴷⴰ ⵏ ⵡⴰⴽⴰⵍ ⴰⵍⵉⴱⵉ.
« ⵙⵜⴻⵕⵃⵉⴱⴻⵖ, ⵙⴻⴳ ⵍⵎⴻⵏⴱⴻⵕ-ⴰ, ⵉⴳⵎⴰⴹ ⴰⵢⵢⴻⵙ ⴼⵓⴽⴻⵏⵜ ⵜⴻⵎⵍⵉⵍⵉⵢⵉⵏ ⵏ ⵜⵎⵓⵔⴰ ⵜⵉⵏⴰⵔⴰⴳⵉⵏ ⵏ ⵍⵉⴱⵢⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⴷ ⵉⴳⵎⴰⴹ ⴰⵢ ⵉⵣⴻⵎⵔⴻⵏ ⴰⴷ ⵙⵊⴻⵀⴷⴻⵏ ⴰⵙⵙⵉⵔⴻⵎ-ⵏⵏⴻⵖ ⵉ ⵍⵎⴻⵏⴷ ⵏ ⵡⵓⵖⴰⵍ ⵏ ⵡⴻⵔⴽⴰⴷ ⵖⴻⵔ ⵜⵎⵓⵔⵜ-ⵏⵏⴻⵖ ⵢⴻⵔⵏⵓ ⵉⴼⴰⴽ ⵛⵛⵡⴰⵍ ⵏ ⵡⴻⵖⵔⴻⴼ ⴰⵍⵉⴱⵉ ⴰⵢ ⵉⴹⴻⵎⵄⴻⵏ ⵉⵎⴰⵍ ⵢⴻⵍⵀⴰⵏ ⵓⴳⴰⵔ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵍⵉⴱⵉ ⵏ ⵢⵉⵡⴻⵥⵍⴰ ⵏ ⵡⴻⵣⵖⴰⵔ, ⵎⵧⵀⴰⵎⵎⴻⴷ ⵜⴰⵀⴰⵔ ⵙⵉⵢⴰⵍⴰ, ⴷⴻⴼⴼⵉⵔ ⵎⴰ ⵖⵔⴰⵏ-ⴷ ⴰⵍⵖⵓ ⴰⴳⴰⵔⴰⵏ ⵏ ⵜⴻⵎⵍⵉⵍⵉⵜ-ⴰ ⵙⴷⴰⵜ ⵢⴻⵎⵜⵜⴻⴽⴽⵉⵢⴻⵏ ⴷ ⵢⵉⵏⴻⵖⵎⴰⵙⴻⵏ ⵉⵖⴻⵍⵏⴰⵡⴻⵏ ⴷ ⵢⴻⴳⵔⴰⵖⵍⴰⵏⴻⵏ.
ⴷⴻⴳ ⵓⵙⴰⵔⴰⴳ ⵏ ⵜⵖⴻⵎⵙⴰ ⴰⵢ ⵉⴳⴰ ⵓⵏⴻⵖⵍⴰⴼ ⵏ ⵢⵉⵡⴻⵥⵍⴰ ⵏ ⵍⵎⴻⵖⵔⴻⴱ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⵙ ⵡⴻⵃⴷⴰⵕ ⵏ ⵓⵎⴰⵣⵓⵏ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵉⵖⴻⴼ ⵏ ⵜⵓⵖⴷⴰⴹⵜ ⵉ ⵍⵉⴱⵢⴰ, ⵎⴰⵔⵜⵉⵏ ⴽⵧⴱⵍⴻⵔ, ⵢⴻⵛⴽⴻⵕ-ⴷ ⵎⴰⵙⵙ ⵙⵉⵢⴰⵍⴰ ⴷⴷⵓⵕ ⵏ ⵍⴻⵣⵣⴰⵢⴻⵔ ⴰⵢⴷⴻⴳ ⴷ-ⵢⴻⵍⵍⴰ ⵡⴻⵎⵢⴰⴳⴻⵔ-ⴰ.
« ⵏⴻⵙⵏⴻⵎⵎⵉⵔ ⵍⴻⵣⵣⴰⵢⴻⵔ ⵖⴻⴼ ⵡⵓⵙⵙⵉⵙⴻⵏ ⴰⵢ ⵜⴳⴰ ⵢⴻⵔⵏⵓ ⵜⴻⵜⵜⴽⴻⵎⵎⵉⵍ ⵜⴻⵜⵜⴻⴳ-ⵉⵜⴻⵏ ⵉ ⵍⵎⴻⵏⴷ ⵏ ⵡⴻⵔⴽⴰⴷ ⴷⴻⴳ ⵜⵎⵓⵔⴰ ⵏ ⵜⴻⵎⵏⴰⴹⵜ ⴷ ⵡⴰⴽⴽ ⵉⵖⴻⵔⴼⴰⵏ-ⵏⵏⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.
ⴷⴻⴳ ⵜⵉⵔⵉⵔⵉⵜ ⵖⴻⴼ ⵢⵉⵡⴻⵜ ⵏ ⵜⵓⵜⵜⵔⴰ ⵖⴻⴼ ⵢⵉⴱⴻⴷⴷⵉⵍⴻⵏ ⵉⴳⴻⵊⴷⴰⵏⴻⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⴽⵔⴰ ⵏ ⵜⴻⵏⵇⵉⴹⵉⵏ ⵏ ⵡⴻⵎⵜⴰⵡⴰ ⴰⵙⴻⵔⵜⴰⵏ ⴰⵢ ⵢⴻⵜⵜⵡⴰⵙⵜⴻⵏⵢⴰⵏ ⴷⴻⴳ ⴷⵓⵊⴻⵎⴱⴻⵕ ⵏ 2015, ⵢⴻⵏⵏⴰ-ⴷ ⵎⴰⵙⵙ ⵙⵉⵢⴰⵍⴰ ⴷⴰⴽⴽⴻⵏ « ⵎⴰⵣⴰⵍ ⵍⵃⴰⵍ ⴰⴷ ⴷ-ⵢⵉⵍⵉ ⵡⴰⵡⴰⵍ ⵖⴻⴼ ⵡⴻⴳⴱⵓⵔ ⵏ ⵢⵉⴱⴻⴷⴷⵉⵍⴻⵏ-ⵏⵏⵉ ⴰⵔⴰ ⴳⴻⵏ. »
