ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⴼⴰⵏ-ⴷ ⵢⵉⵡⴻⵏ ⵏ ⵡⴻⵇⵛⵉⵛ ⵢⴻⵔⵏⵓ ⵔⵔⴰⵏ-ⵜ ⵉ ⵢⴻⵎⵎⴰ-ⵙ 3 ⵏ ⵢⵉⵙⴻⴳⴳⴰⵙⴻⵏ ⴷⴻⴼⴼⵉⵔ ⵎⴰ ⵢⴻⵜⵜⵡⴰⵅⴹⴻⴼ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵓⴼⴰⵏ-ⴷ ⵢⵉⴼⴻⵔⴷⵉⵙⴻⵏ ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ ⵏ ⴱⴻⵔⵔⴰⵇⵉ (ⵜⴰⵡⵉⵍⴰⵢⵜ ⵏ ⵍⴻⵣⵣⴰⵢⴻⵔ) ⵢⵉⵡⴻⵏ ⵏ ⵡⴻⵇⵛⵉⵛ ⵢⴻⵔⵏⵓ ⵔⵔⴰⵏ-ⵜ ⵉ ⵢⴻⵎⵎⴰ-ⵙ ⴷⴻⴼⴼⵉⵔ 3 ⵏ ⵢⵉⵙⴻⴳⴳⴰⵙⴻⵏ ⵙⴻⴳ ⵡⴰⵙⵎⵉ ⴰⵢ ⵜ-ⵢⴻⵅⴹⴻⴼ ⴱⴰⴱⴰ-ⵙ ⵙⴻⴳ ⴼⵕⴰⵏⵙⴰ ⵢⴻⵔⵏⵓ ⵢⴻⵙⵙⴰⴷⴻⴼ-ⵉⵜ-ⵉⴷ ⵖⴻⵔ ⵍⴻⵣⵣⴰⵢⴻⵔ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵙⵙ ⵏ ⵍⴻⵜⵏⵉⵢⴻⵏ, ⵢⵉⵡⴻⵏ ⵏ ⵡⴻⵍⵖⵓ ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ.

ⵜⴰⵎⵀⴻⵍⵜ-ⴰ ⵜⴻⵍⵍⴰ-ⴷ ⵙ « ⵜⴻⵍⵖⴰ ⴰⵢ ⴷ-ⵢⵓⵡⴹⴻⵏ ⵖⴻⵔ ⵢⵉⴼⴻⵔⴷⵉⵙⴻⵏ ⵏ ⵜⴼⴻⵔⵇⴻⵜ ⵏ ⵜⴻⵎⵙⴻⵜⵍⴰ ⵏ ⵛⵛⵕⴰⵕⴱⴰ ⵢⴻⵇⵇⵏⴻⵏ ⵖⴻⵔ ⵓⵏⵏⴻⴳⵔⴰⵡ ⵏ ⴱⴻⵔⵔⴰⵇⵉ, ⴷ ⵜⵉⴷ ⴰⵢ ⴷ-ⵉⴽⴻⵛⴼⴻⵏ ⴷⴰⴽⴽⴻⵏ ⵢⴻⵍⵍⴰ ⵢⵉⵡⴻⵏ ⵏ ⵓⵎⴻⵛⴽⵓⴽ ⵉⵙⴻⵎ-ⵏⵏⴻⵙ ⵎ.ⵀ., ⵢⴻⵙⵄⴰ 43 ⵏ ⵢⵉⵙⴻⴳⴳⴰⵙⴻⵏ ⵢⴻⵔⵏⵓ ⵢⴻⵙⵄⴰ ⵢⵉⴷ-ⵙ ⵎⴻⵎⵎⵉ-ⵙ, ⵉⵙⴻⵎ-ⵏⵏⴻⵙ ⵎ.ⵎ., ⵢⴻⵙⵄⴰ 7 ⵏ ⵢⵉⵙⴻⴳⴳⴰⵙⴻⵏ, ⵢⴻⵔⵏⵓ ⵢⴻⵍⵍⴰ-ⴷ ⴼⴻⵍⵍ-ⴰⵙ ⵓⵏⴰⴷⵉ. ⴰⵎⴷⴰⵏ-ⴰ ⵢⴻⵣⴷⴻⵖ ⴷⴻⴳ ⵢⵉⵡⴻⵜ ⵏ ⵜⵏⴻⵣⴷⵓⵖⵜ ⵢⴻⵜⵜⵡⴰⴽⵔⴰⵏ ⴷⴻⴳ ⵛⵛⵕⴰⵕⴱⴰ, ⴷⴻⴳ ⵜⵖⵉⵡⴰⵏⵜ ⵏ ⴽⴰⵍⵉⵜⵓⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.

ⴷⴻⴼⴼⵉⵔ ⵎⴰ ⵜⴻⴼⴼⴻⵖ-ⴷ ⵍⴻⵡⵚⴰⵢⴰ ⵏ ⵓⴼⴻⵜⵜⴻⵛ ⵙⵖⵓⵔ ⵢⴻⵎⵡⴻⴽⴽⴻⵍ ⵏ ⵜⴻⴳⴷⵓⴷⴰ ⵏ ⵛⵛⵕⴻⵄ ⵏ ⵍⵃⴻⵕⵕⴰⵛ, ⴷⴷⴰⵏ ⵢⵉⴼⴻⵔⴷⵉⵙⴻⵏ ⵏ ⵜⴻⵎⵙⴻⵜⵍⴰ ⵜⴰⵖⴻⵍⵏⴰⵡⵜ ⵖⴻⵔ ⵡⴻⵅⵅⴰⵎ ⵏ ⵓⵎⴻⵛⴽⵓⴽ-ⵏⵏⵉ ⵢⴻⵔⵏⵓ ⵓⴼⴰⵏ-ⴷ ⴷⵉⵏ « ⴰⵇⵛⵉⵛ-ⵏⵏⵉ ⵢⴻⴼⴼⴻⵔ ⴷⴷⴰⵡ ⵢⵉⵡⴻⵏ ⵏ ⵡⵓⵙⵓ ».

ⵢⴻⵜⵜⵡⴰⴹⴹⴻⴼ ⵓⵎⴻⵛⴽⵓⴽ-ⵏⵏⵉ, ⵙⵄⴻⴷⴷⴰⵏ-ⵜ ⵙⴷⴰⵜ ⵢⴻⵎⵡⴻⴽⴽⴻⵍ ⵏ ⵜⴻⴳⴷⵓⴷⴰ ⵏ ⵛⵛⵕⴻⵄ ⵏ ⵍⴰⵕⴻⴱⵄⴰ, ⵢⴻⵔⵏⵓ ⵢⵓⵎⴻⵕ ⵢⴻⵎⵡⴻⴽⴽⴻⵍ-ⴰ ⴰⴷ ⵢⴻⵜⵜⵡⴰⵃⴱⴻⵙ ⵡⴻⵔⴳⴰⵣ-ⴰ ⵙⴻⴳ ⵍⴻⵄⴹⵉⵍ.

ⵎⴰ ⴷ ⴰⴳⵔⵓⴷ-ⵏⵏⵉ ⵔⵔⴰⵏ-ⵜ ⵉ ⵢⴻⵎⵎⴰ-ⵙ ⵜⵓⵣⵔⵉⴼⵜ, ⵎⴰⵙⵙⴰ ⴱ.ⵙ., ⴰⵢ ⵢⴻⵙⵄⴰⵏ 40 ⵏ ⵢⵉⵙⴻⴳⴳⴰⵙⴻⵏ, ⴷⴻⴼⴼⵉⵔ ⵎⴰ ⵜⴻⵇⵇⵉⵎ 3 ⵏ ⵢⵉⵙⴻⴳⴳⴰⵙⴻⵏ (ⵙⴻⴳ 16 Ɣⵓⵛⵜ 2014) ⵓⵔ ⵜⵡⴰⵍⴰ ⴰⵔⴰ ⵎⴻⵎⵎⵉ-ⵙ.