Asebter amenzawi
Ad d-ffɣent tedlisin ɣef yiɣerman n Yeɣzer n Mẓab (amasay)
WEHṚAN – Ur yettɛeḍḍil ara ad d-yessuffeɣ Udiwan n Ummesten d Wesmal n Yeɣzer n Mẓab, amazrar n tedlisin ɣef umezruy adelsan d usegdan n yiɣerman n Tɣerdayt, ɣef wakken ay aɣ-ixebber udiwan-a deg Wehṛan.
Tidlisin-a ad d-sseknent amezruy n yiɣerman n Tɣerdayt, tasegda-nsen, unan-nsen, lbenyanat-nsen iqburen d lebṛuj-nsen, ɣef wakken ay d-yenna yiɣef n umeẓlu n unadi d ussekfeḍ deg udiwan, i lmend n yiwet n tzikkent ɣef tgemmi n Yeɣzer n Mẓab ay yellan tettkemmil ass n letniyen deg usalay aɣelnaw anagdud n « Ahmed-Zabana » n Wehṛan.
Yal yiwet seg tedlisin-a ad d-tili ɣef yiwen seg yiɣerman n Tɣerdayt yernu ad tesɛu tugniwin n yirusfusen d yiɣerman-nni, ɣef wakken ay d-yenna Yahia Bennaceur ay d-yernan dakken amazrar-a n tedlisin ad d-yewjed seg-a ɣer tgara n useggas yernu ad uɣalent d ttawil i lfayda n unadi ɣef tsegda n yiɣerman-a.
Tawilayt n Tɣerdayt tesɛa 9 n yiɣerman, gar-asen 5 usan-d daxel Yeɣzer n Mẓab yernu wi d Lɛaṭef, Ayt Yezgen, Bennuṛa, Mlika d Tɣerdayt, ma d 4 niḍen usan-d beṛṛa n yeɣzer-a yernu wi d Lemniɛa, Metlili, Berreyyan d Legṛaṛa, am wakken ay llan daɣ yiɣerman ay dermen.
Yessuffeɣ-d Udiwan n Ummesten d Wesmal n Yeɣzer n Mẓab (ay yesɛan tasɣimt deg Tɣerdayt) ugar n 35 n yirusfusen seg wasmi ay d-yennulfa deg 1992, d irusfusen ay d-yettwarun ɣef tnegwa yemgerraden n lebni ay llan sseqdacen-tent zik deg yiɣerman am talaɣt, tanagrawt n ussefrek d wefraq n waman, unan, ixxamen insayanen d tṛakniwin.
Nnig waya, yessuffeɣ-d udiwan-a ifetrawen ɣef tgemmi tangant d trangant n Yeɣzer n Mẓab, d tamnaḍt ay yettwaṣennfen d tigemmi taɣelnawt d tegraɣlabnt yernu la yettmahal udiwan-a akken ad yessidef deg wulawen n yigerdan tayri n tgemmi s wunuɣen yettewliwilen ɣef tɣerma n Yeɣzer n Mẓab d ussuffeɣ n yiwen n wemnir amerran i yigerdan, isem-nnes « Watani » (Aɣlan-inu).
Yessahel udiwan-a, deg usalay aɣelnaw n « Ahmed-Zabana » n Wehṛan, yiwet n tnemselt ɣef tɣuri n tgemmi, assuneɣ d tṛakniwin seg 7 d 11 Mayu i lfayda n yigerdan n Wehṛan i lmend n wesfugel n wayyur n tgemmi.
