ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⴳⵉⴵⴵⵉ ⵏ 410 ⵏ ⵜⵡⴰⵛⵓⵍⵉⵏ ⵏ ⵄⴻⵏⵏⴰⴱⴰ ⵖⴻⵔ ⵜⵏⴻⵣⴷⵓⵖⵜ ⵜⴰⵎⴰⵢⵏⵓⵜ

ⵄⴻⵏⵏⴰⴱⴰ – ⵙ ⵓⵊⴻⵎⵎⴰⵍ, ⵙⴳⵓⴵⴵⴻⵏ 410 ⵏ ⵜⵡⴰⵛⵓⵍⵉⵏ, ⴰⵢ ⵢⴻⵍⵍⴰⵏ ⵣⴻⴷⵖⴻⵏⵜ ⴷⴻⴳ ⵜⵏⴻⵣⴷⵓⵖⵜ ⵏ ⴷⵉⵔⵉ ⴷⴻⴳ ⵄⴻⵏⵏⴰⴱⴰ, ⵖⴻⵔ ⵜⵏⴻⵣⴷⵓⵖⵉⵏ-ⵏⵙⴻⵏⵜ ⵜⵉⵎⴰⵢⵏⵓⵜⵉⵏ ⵏ 3 ⵏ ⵜⴻⵅⵅⴰⵎⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵏⵏⴰⵏ ⵢⵉⵎⴻⵥⵍⴰ ⵏ ⵜⵎⴻⵀⵍⴰ ⵏ ⵜⵏⴻⵣⴷⵓⵖⵜ ⴰⵙⵙ ⵏ ⵜⵜⵍⴰⵜⴰ.

ⴰⴷ ⵉⴽⴻⵎⵎⴻⵍ ⵡⴻⵙⴳⵉⴵⴵⵉ-ⴰ (ⴰⵢ ⴷ-ⵢⴻⴱⴷⴰⵏ ⴷⴻⴳ 3 ⵏ ⵡⴰⵢⵢⵓⵔⴻⵏ ⵉⵎⴻⵣⵡⵓⵔⴰ ⵏ ⵓⵙⴻⴳⴳⴰⵙ-ⴰ) ⴰⵔⵎⴰ ⴷ ⵜⴰⴳⴰⵔⴰ ⵏ ⵡⴰⵢⵢⵓⵔ ⵏ ⵎⴰⵢⵓ ⴰⴽⴽⴻⵏ ⴰⴷ ⴷ-ⵉⵃⴰⵣ ⴰⴽⴽ ⵜⵉⵡⴰⵛⵓⵍⵉⵏ ⴰⵢ ⴷ-ⵃⴻⵙⴱⴻⵏ ⴰⴷ ⴰⵙⴻⵏⵜ-ⴼⴽⴻⵏ ⵜⴰⵏⴻⵣⴷⵓⵖⵜ ⵉ ⵍⵎⴻⵏⴷ ⵏ ⵓⵙⵙⴻⵍⵀⵓ ⵏ ⵜⴻⴳⵏⵉⵜ ⵏ ⵜⵎⴻⴷⴷⵓⵔⵜ ⵏ ⵡⵉⴷ ⵓⵎⵉ ⴼⴽⴰⵏ ⵏⴰⵇⴰⵍ ⵜⵉⵏⴻⵣⴷⵓⵖⵉⵏ ⵏ ⵢⵉⵡⴻⵜ ⴽⴰⵏ ⵏ ⵜⴻⵅⵅⴰⵎⵜ ⴷⴻⴳ ⵢⴻⴳⵎⴰⵎⴻⵏ ⵏ ⵙⵙⵉⴱⴱⵓⵙ, ⴻⵍ ⵔⵢⵎ ⴷ 8-ⵎⴻⵖⵔⴻⵙ ⴷⴻⴳ ⵜⴻⵎⵏⴰⴹⵜ ⵏ ⵙⴰⵀⵍ ⴻⵍ-ⴳⵀⴰⵔⴱⵉ ⵏ ⵜⴻⵎⴷⵉⵏⵜ ⵏ ⵄⴻⵏⵏⴰⴱⴰ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ ⵜⵎⴻⵀⵍⴰ-ⴰ.

ⵜⴻⵙⵎⴻⴽⵜⵉ-ⴷ ⴷⴰⵖ ⵜⵎⴻⵀⵍⴰ-ⴰ ⴷⴰⴽⴽⴻⵏ ⴰⴷ ⵔⵏⵓⵏⵜ ⴰⴷ ⵜⵜⵡⴰⴼⴻⵔⵇⴻⵏⵜ 6.000 ⵏ ⵜⵏⴻⵣⴷⵓⵖⵉⵏ ⵜⵉⵏⴰⴳⴷⵓⴷⵉⵏ ⵏ ⵍⴻⴽⵔⴰ ⵉ ⵓⵙⵙⴻⵍⵀⵓ ⵏ ⵜⵎⴻⴷⴷⵓⵔⵜ ⵏ ⵢⵉⵎⴻⵣⴷⴰⵖⴻⵏ ⴰⵢ ⵉⵣⴻⴷⵖⴻⵏ ⴷⴻⴳ ⵢⵉⵣⴰⴷⴰⵖⴻⵏ ⵉⵇⴱⵓⵔⴻⵏ ⵏ ⵜⴻⵎⴷⵉⵏⵜ ⵏ ⵄⴻⵏⵏⴰⴱⴰ.

ⴰⵣⴰⵍ ⵏ 2.000 ⵏ ⵜⵡⴰⵛⵓⵍⵉⵏ ⵓⵎⵉ ⴼⴽⴰⵏ ⵜⴰⵏⴻⵣⴷⵓⵖⵜ ⴷⴻⴳ ⵄⴻⵏⵏⴰⴱⴰ ⴷⴻⴳ 2016. ⵙⴳⵓⴵⴵⴻⵏ-ⵜⴻⵏ ⵙⴻⴳ 11 ⵏ ⵢⵉⵎⵓⴽⴰⵏ ⵏ ⵜⵏⴻⵣⴷⵓⵖⵜ ⵉⵅⵓⵚⵚⴻⵏ ⵢⴻⵔⵏⵓ ⴽⴽⵙⴻⵏ ⵉⵎⵓⴽⴰⵏ-ⵏⵏⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵎⴻⵀⵍⴰ-ⴰ.

ⴰⵙⵙⴻⴷⵔⴻⵎ ⵏ ⵢⵉⵎⵓⴽⴰⵏ-ⴰ ⴷ ⵡⵉⵏ ⴰⵢ ⴷ-ⵢⴻⵙⵔⴻⴱⵃⴻⵏ 32 ⵏ ⵢⵉⵇⴻⵟⵟⴰⵔⴻⵏ ⵏ ⵡⴰⴽⴰⵍ ⵉ ⵜⵖⵉⵡⴰⵏⵉⵏ ⵏ ⵄⴻⵏⵏⴰⴱⴰ, ⵍⴱⵓⵏⵉ, ⵙⵉⴷⵉ ⵄⵎⴻⵕ ⴷ ⵍⵃⴻⴵⴵⴰⵕ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵔⵏⴰ ⵜⵎⴻⵀⵍⴰ-ⴰ.