Asebter amenzawi

Asgiǧǧi n 410 n twaculin n Ɛennaba ɣer tnezduɣt tamaynut

ƐENNABA – S ujemmal, sguǧǧen 410 n twaculin, ay yellan zedɣent deg tnezduɣt n diri deg Ɛennaba, ɣer tnezduɣin-nsent timaynutin n 3 n texxamin, ɣef wakken ay aɣ-d-nnan yimeẓla n tmehla n tnezduɣt ass n ttlata.

Ad ikemmel wesgiǧǧi-a (ay d-yebdan deg 3 n wayyuren imezwura n useggas-a) arma d tagara n wayyur n Mayu akken ad d-iḥaz akk tiwaculin ay d-ḥesben ad asent-fken tanezduɣt i lmend n usselhu n tegnit n tmeddurt n wid umi fkan naqal tinezduɣin n yiwet kan n texxamt deg yegmamen n Ssibbus, El Rym d 8-Meɣres deg temnaḍt n Sahl El-Gharbi n temdint n Ɛennaba, ɣef wakken ay aɣ-d-tenna tmehla-a.

Tesmekti-d daɣ tmehla-a dakken ad rnunt ad ttwaferqent 6.000 n tnezduɣin tinagdudin n lekra i usselhu n tmeddurt n yimezdaɣen ay izedɣen deg yizadaɣen iqburen n temdint n Ɛennaba.

Azal n 2.000 n twaculin umi fkan tanezduɣt deg Ɛennaba deg 2016. Sguǧǧen-ten seg 11 n yimukan n tnezduɣt ixuṣṣen yernu kksen imukan-nni, ɣef wakken ay d-tenna tmehla-a.

Assedrem n yimukan-a d win ay d-yesrebḥen 32 n yiqeṭṭaren n wakal i tɣiwanin n Ɛennaba, Lbuni, Sidi Ɛmeṛ d Lḥeǧǧaṛ, ɣef wakken ay d-terna tmehla-a.