ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵉⴼⵔⴰⵏⵉⵏ ⵜⵉⵙⵙⴻⵏⵜⴰⵏⵉⵏ: ⴰⵎⴻⵏⴹⴰⵔ ⵏ ⵓⵙⵙⴻⵔⵙⵉ ⵏ ⵢⵉⵛⵛⴻⵜⴽⵉⵢⴻⵏ ⵉⴼⵓⴽ ⴰⵙⵙ ⵏ ⵍⴰⵕⴻⴱⵄⴰ ⵜⴰⵎⴻⴷⴷⵉⵜ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵉⴼⵓⴽ ⵓⵎⴻⵏⴹⴰⵔ ⵏ ⵓⵙⵙⴻⵔⵙⵉ ⵏ ⵢⵉⵛⵛⴻⵜⴽⵉⵢⴻⵏ ⵢⴻⵇⵇⵏⴻⵏ ⵖⴻⵔ ⵢⴻⴳⵎⴰⴹ ⵓⵄⴹⵉⵍⴻⵏ ⵏ ⵜⴻⴼⵔⴰⵏⵉⵏ ⵜⵉⵙⵙⴻⵏⵜⴰⵏⵉⵏ ⵏ 4 ⵎⴰⵢⵓ ⴰⵙⵙ ⵏ ⵍⴰⵕⴻⴱⵄⴰ ⵖⴻⴼ ⵜⵉⵙ 8:00 ⵏ ⵜⵎⴻⴷⴷⵉⵜ. ⵉⴳⵎⴰⴹ-ⴰ ⵢⴻⵙⵙⴻⵖⵔⴻⵜ-ⵉⵜⴻⵏ-ⵉⴷ ⵓⵙⴻⵇⵇⴰⵎⵓ ⴰⵎⴻⵏⴹⴰⵡⴰⵏ ⴰⵙⵙ ⵏ ⵍⴻⵜⵏⵉⵢⴻⵏ.

ⴷⴻⴼⴼⵉⵔ ⵎⴰ ⵙⵖⴻⵔⵜⴻⵏ-ⴷ ⵉⴳⵎⴰⴹ ⵓⵄⴹⵉⵍⴻⵏ, ⵢⴻⵙⵎⴻⴽⵜⵉ-ⴷ ⵓⵙⴻⵇⵇⴰⵎⵓ ⴰⵎⴻⵏⴹⴰⵡⴰⵏ ⴷⴰⴽⴽⴻⵏ, ⵙ ⵓⵇⴰⴷⴻⵔ ⵏ ⵓⵎⴰⴳⵔⴰⴷ 171 ⵏ ⵓⵙⴰⴹⵓⴼ ⴰⴳⵎⴰⵏⴰⵏ ⵢⴻⵇⵇⵏⴻⵏ ⵖⴻⵔ ⵓⵏⴰⴳⵔⴰⵡ ⴰⴼⵔⴰⵏⴰⵏ, ⵢⴰⵍ ⴰⵎⴰⵣⵡⴰⵔ ⵏⴻⵖ ⴰⴽⴰⴱⴰⵔ ⴰⵙⴻⵔⵜⴰⵏ ⵢⴻⵜⵜⴻⴽⴽⴰⵏ ⴷⴻⴳ ⵜⴻⴼⵔⴰⵏⵉⵏ ⵜⵉⵙⵙⴻⵏⵜⴰⵏⵉⵏ ⵢⴻⵙⵄⴰ ⴰⵣⵔⴻⴼ ⴰⴷ ⵢⴻⵛⵛⴻⵜⴽⵉ ⵙ ⵓⵙⵙⵓⵜⴻⵔ ⴷ ⴰⵃⴻⵔⴼⵉ ⴰⵔⴰ ⵢⴻⵙⵙⴻⵔⵙ ⵖⴻⴼ ⵓⵏⴰⵡⴰⵔ ⵏ ⵓⵙⴻⵇⵇⴰⵎⵓ ⴰⵎⴻⵏⴹⴰⵡⴰⵏ ⴷⴻⴳ 48 ⵏ ⵢⴻⵙⵔⴰⴳⴻⵏ ⵉⵎⴻⵣⵡⵓⵔⴰ ⴰⵔⴰ ⴷ-ⵉⴹⴻⴼⵔⴻⵏ ⴰⵙⵙⴻⵖⵔⴻⵜ ⵏ ⵢⴻⴳⵎⴰⴹ-ⴰ. ⵙ ⵡⴰⵢⴰ, ⴰⵎⴻⵏⴹⴰⵔ ⵏ ⵓⵛⵛⴻⵜⴽⵉ ⵢⴻⴱⴷⴰ ⴰⵙⵙ ⵏ ⵍⴻⵜⵏⵉⵢⴻⵏ ⵖⴻⴼ ⵜⵉⵙ 8:00 ⵏ ⵜⵎⴻⴷⴷⵉⵜ ⵢⴻⵔⵏⵓ ⵉⴼⵓⴽ ⴰⵙⵙ ⵏ ⵍⴰⵕⴻⴱⵄⴰ ⵖⴻⴼ ⵜⵉⵙ 8:00 ⵏ ⵜⵎⴻⴷⴷⵉⵜ.

ⵖⴻⴼ ⵍⴻⵃⵙⴰⴱ ⵏ ⵢⴻⴳⵎⴰⴹ ⵓⵄⴹⵉⵍⴻⵏ ⴰⵢ ⴷ-ⵢⴻⵙⵙⴻⵖⵔⴻⵜ ⵓⵙⴻⵇⵇⴰⵎⵓ ⴰⵎⴻⵏⴹⴰⵡⴰⵏ, ⴰⴽⵜⴰⵎⵓⵔ ⵏ ⵓⵜⵜⴻⴽⴽⵉ ⴷⴻⴳ ⵜⴻⴼⵔⴰⵏⵉⵏ ⵏ 4 ⵎⴰⵢⵓ 2017 ⵢⵓⵡⴻⴹ ⵖⴻⵔ 35,37%, ⴷ ⵡⵉⵏ ⴰⵢⴷⴻⴳ ⵜⵜⴻⴽⴽⴰⵏ 8.225.223 ⵏ ⵢⵉⴷⴻⵖⵖⴰⵔⴻⵏ ⵙⴻⴳ ⴳⴰⵔ 23.251.503 ⵏ ⵢⵉⴼⴻⵔⵔⴰⵏⴻⵏ ⴰⵢ ⵢⴻⵎⵎⴻⵕⴽⴰⵏ, ⵎⴰ ⴷ ⵜⵓⵖⴰⵛ ⴰⵢ ⴷ-ⵢⴻⵜⵜⵡⴰⵙⵙⴻⵏⴼⴰⵍⵉⵏ ⵓⵡⴹⴻⵏ-ⵜ ⵖⴻⵔ 6.468.180, ⵜⵉⵊⴻⵍⵍⴰⴱⵉⵏ ⵜⵉⵍⵎⴰⵡⵉⵏ ⵓⵡⴹⴻⵏⵜ ⵖⴻⵔ 1.757.043. ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⴳⵎⴰⴹ ⴰⵢ ⴷ-ⵓⵡⵢⴻⵏ ⵢⵉⴽⴰⴱⴰⵔⴻⵏ ⵉⵙⴻⵔⵜⴰⵏⴻⵏ, ⴰⵎⵙⴻⴳⵔⴰⵡ ⴰⵖⴻⵍⵏⴰⵡ ⴰⵎⴻⴳⴷⴰⵢ (ⵔⵏⴷ) ⵢⴻⵔⴱⴻⵃ 3 ⵏ ⵜⴻⵙⵖⵉⵎⵉⵏ ⵜⵉⵎⴰⵢⵏⵓⵜⵉⵏ ⵢⴻⵔⵏⵓ ⵢⵓⵡⴻⵢ-ⴷ 100 ⵏ ⵜⴻⵙⵖⵉⵎⵉⵏ ⴷⴻⴳ ⵡⴻⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ, ⵎⴰ ⴷ ⵜⵉⵔⵏⵉ ⵏ ⵡⴻⵙⵍⴻⵍⵍⵉ ⴰⵖⴻⵍⵏⴰⵡ ⵢⴻⵇⵇⵉⵎ ⴷ ⵏⴻⵜⵜⴰ ⴰⵢ ⴷ ⴰⴽⴰⴱⴰⵔ ⴰⵢ ⵢⴻⵙⵄⴰⵏ ⵜⵉⴳⵜⵉ ⵙ 164 ⵏ ⵜⴻⵙⵖⵉⵎⵉⵏ. ⴰⴽⴰⴱⴰⵔ ⵡⵉⵙ ⴽⵔⴰⴹ ⴷ ⴰⵎⵓⵙⵙⵓ ⵏ ⵜⵎⴻⵜⵜⵉ ⵏ ⵜⴰⵍⵡⵉⵜ (ⵀⵎⵙ) ⴰⵢ ⵢⴻⵙⵄⴰⵏ 33 ⵏ ⵜⴻⵙⵖⵉⵎⵉⵏ.

ⴰⴽⴰⴱⴰⵔ ⵏ ⵜⴰⵊⴰⵎⵧⵓⴰ ⴰⵎⴻⵍ ⴻⵍ ⵊⴰⵣⴰⵉⵔ (ⵜⴰⵊ – ⴰⵎⵙⴻⴳⵔⴰⵡ ⵏ ⵓⵙⵙⵉⵔⴻⵎ ⵏ ⵍⴻⵣⵣⴰⵢⴻⵔ) ⵢⴻⵇⵇⵉⵎ ⴽⴰⵏ ⴷⴻⴳ 19-ⵏⵏⴻⵙ ⵏ ⵜⴻⵙⵖⵉⵎⵉⵏ, ⴰⴽⴽⴻⵏ ⴷⴰⵖ ⴰⵢ ⵜⴻⵇⵇⵉⵎ ⵜⴻⵎⵙⵉⵙⵉⵜ ⵏ ⵏⴰⵀⴷⴰ-ⴰⴷⴰⵍⴰ ⴱⵉⵏⴰ ⴷⴻⴳ 15 ⵏ ⵜⴻⵙⵖⵉⵎⵉⵏ. ⵜⵉⵔⵏⵉ ⵏ ⴻⵍ ⵎⵧⵓⵙⵜⴰⴽⴱⴰⵍ (ⵜⴻⵔⵏⵉ ⵏ ⵢⵉⵎⴰⵍ, ⴼⵎ) ⵜⴻⵙⵄⴰ 14 ⵏ ⵜⴻⵙⵖⵉⵎⵉⵏ, ⵢⴻⵔⵏⵓ ⴷ ⴰⵏⴻⵛⵜ-ⴰ ⴷⴰⵖ ⴰⵢ ⴰⵙ-ⴷ-ⵉⵚⴰⵃⴻⵏ ⵉ ⵜⴻⵔⵏⵉ ⵏ ⵢⵉⵖⴰⵍⵍⴻⵏ ⵉⵏⴻⵎⵍⴰⵢⴻⵏ. ⴰⵎⵓⵙⵙⵓ ⴰⵖⴻⵔⴼⴰⵏ ⴰⴷⵣⴰⵢⵔⵉ ⵚⴰⵃⴻⵏⵜ-ⵜ-ⵉⴷ 13 ⵏ ⵜⴻⵙⵖⵉⵎⵉⵏ, ⴰⴽⴰⴱⴰⵔ ⵏ ⵢⵉⵅⴻⴷⴷⴰⵎⴻⵏ 11 ⵏ ⵜⴻⵙⵖⵉⵎⵉⵏ, ⵎⴰ ⴷ ⴰⵎⵙⴻⴳⵔⴰⵡ ⵉ ⵢⴻⴷⵍⴻⵙ ⴷ ⵜⵓⴳⴷⵓⵜ ⵚⴰⵃⴻⵏⵜ-ⵜ-ⵉⴷ 9 ⵏ ⵜⴻⵙⵖⵉⵎⵉⵏ.

ⵜⴰⵎⵙⵉⵙⵉⵜ ⵜⴰⵖⴻⵍⵏⴰⵡⵜ ⵜⴰⵏⴰⴳⴷⵓⴷⵜ (ⴰⵏⵔ) ⵜⴻⵔⵏⴰ-ⴷ 2 ⵏ ⵜⴻⵙⵖⵉⵎⵉⵏ ⵢⴻⵔⵏⵓ ⵜⵓⵡⴻⴹ ⵖⴻⵔ 8, ⵎⴰ ⴷ ⵜⵉⵔⵏⵉ ⵜⴰⵖⴻⵍⵏⴰⵡⵜ ⵜⴰⴷⵣⴰⵢⵔⵉⵜ ⵜⴻⵙⵕⵓⵃ ⵜⴰⵙⵖⵉⵎⵜ-ⵏⵏⴻⵙ ⵜⴰⵡⵃⵉⴷⵜ ⴰⵢ ⵜⴻⵍⵍⴰ ⵏⴰⵇⴰⵍ ⵜⴻⵙⵄⴰ-ⵜⵜ ⴷⴻⴳ ⵡⴻⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ. ⵉⴽⴰⴱⴰⵔⴻⵏ ⵏⵉⴹⴻⵏ ⵇⵇⵉⵎⴻⵏ ⴽⴰⵏ ⴷⴻⴳ ⵢⴻⴳⵎⴰⴹ-ⵏⵙⴻⵏ ⴰⵢ ⴷ-ⵢⴻⵙⵙⴻⵖⵔⴻⵜ ⵏⴰⵇⴰⵍ ⵡⴻⵖⵍⵉⴼ ⵏ ⵢⵉⵡⴻⵥⵍⴰ ⵏ ⵓⴳⴻⵏⵙⵓ.

ⵜⵉⵙⴻⴷⵏⴰⵏ ⴹⴹⴼⴻⵏⵜ 121 ⵏ ⵜⴻⵙⵖⵉⵎⵉⵏ ⵢⴻⵔⵏⵓ ⵢⵓⵡⴻⴹ ⵡⴻⴽⵜⴰⵎⵓⵔ ⵏ ⵓⴳⴳⴻⵏⵙⴻⵙ-ⵏⵙⴻⵏⵜ ⴷⴻⴳ ⵡⴻⴳⵔⴰⵡ ⵖⴻⵔ 26,19%.