ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⵙⴻⵊⵔⴻⵎ ⵏ ⵡⴻⵔⴽⴰⴹ ⵏ ⵢⵉⵣⴻⵔⴼⴰⵏ ⵏ ⵡⴰⵢⵍⴰ ⴰⴳⴳⴰⴳⴰⵏ ⴷⴻⴳ ⵜⵖⴻⵎⵙⴰ ⴷ ⵜⴻⵙⴷⴰⵡⵉⵜ (ⴰⵙⴰⵔⴰⴳ)
ⵙⵓⵇ ⴰⵀⵕⴰⵙ – ⵉⵃⴻⵜⵜⴻⵜ-ⴷ ⵓⵙⴰⵔⴰⴳ ⴰⵖⴻⵍⵏⴰⵡ ⵖⴻⴼ « ⵜⵖⴻⵎⵙⴰ ⵜⴰⴷⵣⴰⵢⵔⵉⵜ ⴳⴰⵔ ⵢⵉⵍⵓⴳⴰⵏ ⵏ ⵓⵙⴰⴷⵓⵔ ⴷ ⵜⵎⴰⵔⴰ ⵏ ⵜⵉⵍⴰⵡⵜ », ⴰⵢ ⵉⴼⵓⴽⴻⵏ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵜⴻⵙⴷⴰⵡⵉⵜ ⵏ ⵎⵧⵀⴰⵎⴻⴷ-ⵛⵀⴻⵔⵉⴼ-ⵎⴻⵙⵙⴰⴰⴷⵉⴰ, ⴷⴻⴳ ⵙⵓⵇ ⴰⵀⵕⴰⵙ, ⵖⴻⴼ ⵓⵙⵙⴻⵊⵔⴻⵎ ⵏ ⵡⴻⵔⴽⴰⴹ ⵏ ⵢⵉⵣⴻⵔⴼⴰⵏ ⵏ ⵡⴰⵢⵍⴰ ⴰⴳⴳⴰⴳⴰⵏ ⴷⴻⴳ ⵢⵉⵏⵓⵔⴰⵔ ⵏ ⵜⵖⴻⵎⵙⴰ ⴷ ⵜⴻⵙⴷⴰⵡⵉⵜ.
ⵎⵍⴰⵍⴻⵏ-ⴷ, ⴷⴻⴳ ⵡⴻⵎⵢⴰⴳⴻⵔ-ⴰ, ⵢⴻⵎⵜⵜⴻⴽⴽⵉⵢⴻⵏ ⵙⴻⴳ ⵜⵡⵉⵍⴰⵢⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ, ⵢⴻⵔⵏⵓ ⵃⴻⵜⵜⴻⵜⴻⵏ-ⴷ ⴷⴰⵖ ⵖⴻⴼ ⵡⴻⴷⵀⴰⵍ ⵏ ⵜⵉⵙⵙⴻⵖⵏⴻⵡⵜ ⴷⴻⴳ ⵡⴻⵏⵔⴰⵔ ⵏ ⵡⴻⵙⵍⵉⵥⵔⵉ, ⴰⵙⵙⴻⴱⴷⴻⴷ ⵏ ⵓⵙⴰⴹⵓⴼ ⴰⵔⴰ ⵢⴻⵙⵙⵓⴷⴷⵙⴻⵏ ⴰⵙⴰⴷⵓⵔ ⵏ ⵢⵉⵎⵉⴷⵢⴰⵜⴻⵏ ⴷ ⵓⵎⵎⴻⵙⵜⴻⵏ ⵙⴻⴳ ⵡⴰⵍⵍⵓⵙ ⵏ ⵡⴰⵢⴻⵏ ⴰⵢ ⴷ-ⵢⴻⵜⵜⵡⴰⵔⵓⵏ ⵢⴰⴳⵉ.
ⵏⴻⵚⵃⴻⵏ-ⴷ ⴷⴰⵖ ⵢⴻⵎⵜⵜⴻⴽⴽⵉⵢⴻⵏ ⵙ ⵓⵏⴻⵄⵔⵓⴹ ⵏ ⵢⵉⵎⴰⵣⵣⴰⴳⴻⵏ ⴷⴻⴳ ⵓⵙⴰⴹⵓⴼ ⴷ ⵢⵉⵏⴻⵎⵀⴰⵍⴻⵏ ⵏ ⵡⵓⴷⵓⵙⴻⵏ ⵏ ⵜⵖⴻⵎⵙⴰ ⵖⴻⵔ ⵢⴻⵎⵢⴰⴳⵔⴻⵏ ⵖⴻⴼ ⵜⴻⵣⴷⴻⴳ ⵏ ⵚⵚⴻⵏⵄⴰ ⵏ ⵜⵖⴻⵎⵙⴰ, ⴷ ⵓⵙⵙⴻⵔⵎⴻⴷ ⵏ ⵜⵙⵓⴷⴰ ⴰⵢ ⴷ-ⵢⴻⵍⵀⴰⵏ ⵙ ⵓⵙⵙⵓⴷⴷⴻⵙ ⵏ ⵓⵙⴰⴷⵓⵔ, ⴰⴷⴰⴱⵓ ⵏ ⵓⵙⵙⴻⵖⵢⴻⴷ ⴷ ⵢⵉⵙⴰⴹⵓⴼⴻⵏ ⵏ ⵓⵙⵙⴻⵍⵖⵓ.
ⵙⴻⴳ ⵢⵉⴷⵉⵙ ⵏⵉⴹⴻⵏ, ⴱⴻⴷⵔⴻⵏ-ⴷ ⵢⴻⵎⵜⵜⴻⴽⴽⵉⵢⴻⵏ ⴰⵅⴻⵏⴷⵓⵇ ⵢⴻⵍⵍⴰⵏ ⴳⴰⵔ ⵜⴻⵙⴷⴰⵡⵉⵜ ⴷ ⵜⵙⵓⴷⴰ ⵏ ⵢⵉⵙⴰⵍⴰⵏ ⵢⴻⵔⵏⵓ ⵏⵏⴰⵏ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⵙⵎⴻⵍ ⵡⴻⵏⵔⴰⵔ ⵏ ⵓⵙⵙⴻⵍⵖⵓ ⴷ ⵜⴻⵖⵡⴰⵍⵜ ⵙ ⵢⵉⵅⴻⴷⴷⴰⵎⴻⵏ ⵉⴷⵉⴳⴰⵏⴻⵏ ⴷ ⵢⵉⵡⴻⵔⴷⴰⵏⵉⵢⴻⵏ.
ⵓⵇⴱⴻⵍ ⵡⴰⵢⴰ, ⵉⵡⴻⴽⴽⴻⴷ-ⴷ ⵏⴰⵙⵔⴻⴷⵉⵏⴻ ⴱⵧⵓⵣⵉⴰⵏⴻ (ⵏ ⵜⴻⵙⴷⴰⵡⵉⵜ ⵏ ⵇⵙⴻⵏⵟⵉⵏⴰ ⵜⵉⵙ 3) ⵜⴰⵎⵍⵉⵍⵜ ⵏ ⵢⵉⵎⵉⴷⵢⴰⵜⴻⵏ ⵉⴷⵉⴳⴰⵏⴻⵏ ⴷ ⵡⵓⵇⵔⵉⴱⴻⵏ ⴷⴻⴳ ⵜⵏⴻⴼⵍⵉⵜ ⵜⵓⵏⵣⵉⴳⵜ ⴰⵢ ⵢⴻⴷⴷⴰⵏ ⴷ ⵡⴰⵀⵉⵍ ⴰⵢ ⴷ-ⵀⴻⵢⵢⴰⵏ ⵢⵉⴷⵓⴱⴰ ⵉⵏⴰⴳⴷⵓⴷⴻⵏ. ⵎⴰ ⴷ ⵢⴰⵛⵉⵏⴻ ⴽⵀⴻⴷⴰⵉⵔⵉⴰ ⵏ ⵜⴻⵙⴷⴰⵡⵉⵜ ⵏ ⵙⵓⵇ ⴰⵀⵕⴰⵙ, ⵉⴳⴻⵔ-ⴷ ⵜⵉⵖⵔⵉ ⵉ ⵜⴻⵙⵏⵓⴷⴷⴻⵙⵜ ⵏ ⵓⵙⵙⴻⵍⵖⵓ ⴰⵢ ⵉⵙⴻⵎⵎⵍⴻⵏ ⴰⵣⴰⵍⴻⵏ ⵏ ⵜⵉⵖⵖⴻⵔⵎⵉ ⵢⴻⵔⵏⵓ ⵜⴻⵙⵃⵓⵍⴼⵓⵢ ⴰⵖⴻⵔⵎⴰⵏ ⵖⴻⴼ ⵡⴻⵃⵔⴰⵣ ⵏ ⵓⵎⴻⵣⵔⵓⵢ-ⵏⵏⴻⵙ, ⵜⴰⵎⴰⴳⵉⵜ-ⵏⵏⴻⵙ ⴷ ⵢⵉⵣⴰⵎⵓⵍⴻⵏ ⵏ ⵜⴼⴻⵔⴼⴰⵏⵜ.
ⵖⴻⴼ ⵍⴻⵃⵙⴰⴱ-ⵏⵏⴻⵙ, ⵉⵏⴻⵖⵎⴰⵙⴻⵏ ⵉⴷⵣⴰⵢⵔⵉⵢⴻⵏ ⵃⵡⴰⵊⴻⵏ ⴰⴷ ⵙⵏⴻⴼⵍⵉⵏ ⵉⵎⵍⴰⵣⵎⴰⵔⴻⵏ-ⵏⵙⴻⵏ ⴰⴽⴽⴻⵏ ⴰⴷ ⴷ-ⴼⴽⴻⵏ ⴰⴳⴱⵓⵔ ⴷ ⵓⵎⴻⵥⵍⵓ ⴰⵏⴰⴳⴷⵓⴷ ⵏ ⵜⵖⴰⵔⴰ.
