ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵢⴻⵙⵙⴻⴼⴽ ⵜⵜⵡⴰⵙⵙⵏⴻⵏⵜ ⵓⴳⴰⵔ ⵜⵚⴻⴽⴽⵉⵡⵉⵏ ⵏ ⵎⵧⵓⵍⵧⵓⴷ ⵎⴰⵎⵎⴻⵔⵉ (ⵍⴻⵡⵚⴰⵢⴰⵜ)
ⵡⴻⵀⵕⴰⵏ – ⴰⵟⴰⵙ ⵏ ⵍⴻⵡⵚⴰⵢⴰⵜ ⴰⵢ ⴷ-ⵢⴻⴼⴼⵖⴻⵏ, ⴰⵙⵙ ⵏ ⵍⵃⴻⴷⴷ, ⴷⴻⴳ ⵡⴻⵀⵕⴰⵏ, ⵉ ⵍⵎⴻⵏⴷ ⵏ ⵡⴻⵅⵜⴰⵎ ⵏ ⵓⵙⴰⵔⴰⴳ ⵏ ⵡⴻⵙⴼⵓⴳⴻⵍ ⵏ ⵜⵍⴰⵍⵉⵜ ⵏ ⵎⵧⵓⵍⵧⵓⴷ ⵎⴰⵎⵎⴻⵔⵉ, ⵢⴻⵔⵏⵓ ⵉⵙⵡⵉ-ⵏⵙⴻⵏⵜ ⴷ ⴰⵙⵙⵓⵙⵙⴻⵏ ⵏ ⵜⵚⴻⴽⴽⵉⵡⵉⵏ ⵏ ⵓⵎⴰⵔⵓ ⴷ ⵡⴻⵎⵏⴰⴷⵉ-ⴰ.
ⵉⵙⵡⵉ ⵏⴻⵜⵜⴰ ⴷ ⴰⵙⵙⵉⴼⵙⴻⵙ ⵏ ⵜⵚⴻⴽⴽⵉⵡⵉⵏ ⵏ ⵎⵧⵓⵍⵧⵓⴷ ⵎⴰⵎⵎⴻⵔⵉ ⴰⴽⴽⴻⵏ ⴰⴷ ⵜⴻⵏⵜ-ⵙⵙⵏⴻⵏ ⴰⴽⴽ ⵎⴻⴷⴷⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵙⵉ ⴻⵍ ⵀⴰⵛⵀⴻⵎⵉ ⴰⵙⵙⴰⴷ, ⴰⵎⴰⵔⵓ ⴰⵎⴰⵜⵓ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ ⴰⵢ ⵢⴻⵙⵙⵓⴷⴷⵙⴻⵏ ⴰⵙⴰⵔⴰⴳ-ⴰ ⴷⴻⴳ ⵓⵎⴻⵣⴳⵓⵏ ⵏ ⴰⴱⴷⴻⵍⴽⴰⴷⴻⵔ-ⴰⵍⵍⵧⵓⵍⴰ ⵏ ⵡⴻⵀⵕⴰⵏ, ⴷ ⴰⵙⴰⵔⴰⴳ ⴰⵢ ⴷ-ⵢⴻⵍⵍⴰⵏ ⴷⴷⴰⵡ ⵍⴻⵄⵏⴰⵢⴰ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ.
ⵢⴻⵏⵏⴰ-ⴷ ⴷⴰⵖ ⵓⵎⴰⵔⵓ ⴰⵎⴰⵜⵓ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵉ ⵜⵉⵎⵎⵓⵣⵖⴰ ⴷⴰⴽⴽⴻⵏ ⴰⵙⵙⵓⵎⴻⵔ ⵏ ⵢⴻⵎⵜⵜⴻⴽⴽⵉⵢⴻⵏ ⵉⵙⵡⵉ-ⵏⵏⴻⵙ ⴷ ⴰⵙⵙⵓⵙⵙⴻⵏ ⵏ ⵜⵚⴻⴽⴽⵉⵡⵉⵏ ⵏ ⵎⴰⵎⵎⴻⵔⵉ ⵓⵍⴰ ⵉ ⵢⵉⵍⴻⵎⵥⵉⵢⴻⵏ ⴰⴽⴽⴻⵏ ⴰⴷ ⵜⴻⵏⵜ-ⵖⵔⴻⵏ, ⵍⴰⴷⵖⴰ ⵙ ⵡⴻⴱⵔⵉⴷ ⵏ ⵓⵙⵙⴻⵣⴳⵉ ⵏ ⵜⵚⴻⴽⴽⵉⵡⵉⵏ-ⵏⵏⴻⵙ ⵖⴻⵔ ⵜⵙⵓⵍⴰⵍ ⵜⵉⴳⵜⴰⵍⵖⴰⵏⵉⵏ ⴷ ⵓⵣⴰⵡⴰⴳ ⵏ ⵡⵓⵏⵓⵖⴻⵏ.
ⴰⵙⴰⵔⴰⴳ-ⴰ ⵢⴻⵍⵍⴰ-ⴷ ⵙ ⵓⵙⴻⵏⵜⴻⵍ ⵏ « ⵜⵉⵔⵣⵉ ⵏ ⵙⵙⵉⵏⵉⵎⴰ ⵖⴻⴼ ⵜⵚⴻⴽⴽⴰ ⵏ ⵎⴰⵎⵎⴻⵔⵉ », ⵢⴻⵔⵏⵓ ⵏⵏⴰⵏ-ⴷ ⴷⴰⵖ ⴷⴻⴳ-ⵙ ⵢⴻⵎⵜⵜⴻⴽⴽⵉⵢⴻⵏ ⴷⴰⴽⴽⴻⵏ « ⵢⴻⵙⵙⴻⴼⴽ ⴰⴷ ⵜⵜⵡⴰⵙⵎⴻⴹⵏⴻⵏⵜ ⴰⴽⴽ ⵜⵉⵙⵔⴰⵙ ⴰⵢ ⴷ-ⵢⴻⵍⵍⴰⵏ ⴷⴻⴳ ⵜⴻⵙⴷⴰⵡⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⴷ ⵜⵡⴻⵔⴷⴰⵏⵉⵢⵉⵏ ⵖⴻⴼ ⵡⵓⴳⵓⵔ ⵏ ⵓⵙⵙⴻⵣⴳⵉ ⵏ ⵜⵚⴻⴽⴽⵉⵡⵉⵏ ⵜⵉⵙⴻⴽⵍⴰⵏⵉⵏ ⵜⵉⴷⵣⴰⵢⵔⵉⵢⵉⵏ ⵖⴻⵔ ⵙⵙⵉⵏⵉⵎⴰ ⴷ ⵓⵎⴻⵣⴳⵓⵏ ».
ⴰⵢⴰ ⴰⴷ ⵢⴻⵙⵙⵉⵡⴻⴹ, ⴷⴻⴳ ⵜⴳⴰⵔⴰ, ⵖⴻⵔ ⵓⵙⵙⴻⴱⴷⴻⴷ ⵏ « ⵓⵊⴻⵔⵔⴻⴷ ⴰⴷⵔⵉⵔⴰⵡⴰⵏ ⵉ ⵍⴼⴰⵢⴷⴰ ⵏ ⵢⴻⵎⵏⴰⴷⵉⵢⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴰⵙⵙⴰⴷ ⴰⵢ ⴷ-ⵢⴻⵔⵏⴰⵏ ⴷⴰⴽⴽⴻⵏ, ⴷⴻⴳ ⵓⴽⴰⵜⴰⵔ ⵏ ⵓⵎⵓⵍⵍⵉ-ⴰ ⵡⵉⵙ 100, ⵢⴻⵙⵙⴻⴼⴽ ⴰⴷ ⵜⴻⵜⵜⵓⵏⴻⴼⴽ ⵜⵓⵣⵡⵉⵔⵜ ⵉ ⵜⵚⴻⴽⴽⵉⵡⵉⵏ ⵏ ⵎⴰⵎⵎⴻⵔⵉ.
ⴳⵔⴻⵏ-ⴷ ⴷⴰⵖ ⵢⴻⵎⵙⴰⵔⴰⴳⴻⵏ ⵜⵉⵖⵔⵉ ⵉ « ⵡⴻⵙⵎⴰⵍ ⵏ ⵓⵎⴰⵀⵉⵍ ⴰⵢ ⴳⴰⵏ ⵢⵉⵏⴰⵔⵎⴻⵏ ⵢⴻⵎⴳⴻⵔⵔⴰⴷⴻⵏ ⵏ ⵓⵏⴰⴷⵉ ⴰⵢ ⴷ-ⵢⴻⵍⵀⴰⵏ ⵙ ⵢⵉⵙⴻⵏⵜⴰⵍ-ⴰ ⵙ ⵓⵙⵙⴻⴱⵖⴻⵙ ⵏ ⵜⵉⴳⴰⵡⵜ ⵏ ⵓⵥⴻⴹⴹⴰ ⴷ ⵜⵉⵛⵛⵓⵔⴽⴰ », ⴷ ⵓⵙⵙⴻⴱⵖⴻⵙ ⵏ ⵓⵙⵙⵓⵖⴻⵍ ⵏ ⵢⵉⵎⴰⵀⵉⵍⴻⵏ ⴷ ⵓⵏⴰⴷⵉ ⵖⴻⵔ ⵜⵎⴰⵣⵉⵖⵜ ⴷ ⵜⴰⵄⵕⴰⴱⵜ.
