Asebter amenzawi

Lubnan tenna-d dakken aɣrab ay la tbennu Isṛayil ɣef tlisa yečča-d seg wakal-nnes

BIRUT– Tenna-d Lubnan, ass n ttlata, dakken la tessefray ad d-tebdu tigawt tadiplumatit mgal weɣrab n ubiṭun ay la tbennu Isṛayil ɣef tlisa gar snat-a n tmura, yernu twekked-d dakken kra n yeḥricen seg weɣrab-a ččan-d seg wakal alubnani. Deg 2012, tebda Isṛayil lebni n yiwen n weɣrab ɣef tlisa d Lubnan yernu teḍfer ayen yettwasemman « izirig aẓerwal », d talast ay tga Tuddsa n Yeɣlanen Yeddukklen deg useggas n 2000 gar Isṛayil d Lubnan yernu d win ay d izirig n weḥbas n yimenɣi gar snat-a n tmura. Deffir yiwen n wemyager ay d-yellan, ass n ttlata, gar uselway alubnani Michel Aoun, aneɣlaf amenzu Saad Hariri d uselway n wemni Nabih Berri, twekked-d tselwit talubnanit, deg yiwen n welɣu, dakken la tessefray ad tkemmel ussisen n ussebges, ama deg weswir amnaḍan neɣ agraɣlan, akken ad tesseḥbes Isṛayil seg lebni n weɣrab-a daxel wakal alubnani. Ula ma snat-a n tmura mseɛdawent, imasayen iserdasanen ilubnaniyen d wid n Isṛayil nnummen ttemlilin-d ddaw leɛnaya n FINUL (Tadusi Tabdammast n Yeɣlanen Yeddukklen deg Lubnan) akken ad ssiwlen ɣef wuguren n tlisa. Ass n letniyen, yella-d wemyager d udiwenni ɣef « yimahilen n tijjenyeṛt deg wenẓul n yizirig aẓerwal », ɣef leḥsab n yiwen n welɣu n FINUL. « S kra n wermud ara d-yilin sdat yizirig aẓerwal yessefk ad d-xebbren fell-as uqbel ma yella-d akken ur d-yettili ara wugur deg wemsefham neɣ kra n umennuɣ. Yesseḥder-d daɣ welɣu n tselwit talubnanit seg « wejlaq » ay tebɣa Isṛayil ad tejleq urrig d upitṛul n yilel yellan deg waman ilubnaniyen. Lubnan ad tezmel, ass n ljemɛa, iguta d yiwet n tegrawt n teṛmisin aydeg ttekkant teṛmist tafṛansit n Total, taṛmist taṭalyanit n ENI d teṛmist tarusit n Novatek akken ad bdunt asnirem n tmerɣa deg waman ilubnaniyen. Sin n yiḥedren ay yerza wesnirem-a yiwen seg-sen Iḥder Wis 9 ay d-yusan ɣef tlisa gar waman ilubnaniyen d wid n Isṛayil.