Asalay

Asalay d tasudut (institution) anda ay jemmɛen talkensit (collection) n tɣawsiwin yesɛan azal, ama d tiɣawsiwin n uẓuri neɣ d tid yesɛan azal adelsan, amezruyan neɣ d ussnan. Aṭas n yisalayen ay d-yesrusuyen tiɣawsiwin-a deg tzikknin (expositions) tuɛḍilin neɣ d timezgiyin akken ad tent-iwali ugdud. Isalayen imeqranen akk usan-d deg temdinin timeqranin deg temnaḍin yemgerraden n umaḍal, maca llan yigiman (milliers) n yisalayen niḍen deg temdinin timecṭuḥin. Isalayen sɛan iswiyen yemgerraden, gar-asen wid ay ireẓmen i ugdud s umata, am wakken ay llan wid aydeg ttwajemɛent tɣawsiwin i lfayda n yimnadiyen d yimazzagen (spécialistes).

Llan aṭas n wazunen n yisalayen, gar-asen isalayen n tẓuri, wid n umezruy agaman, wid n tussna, wid n umgaru d wid n yigerdan. Gar yisalayen ayɣef d-rezzun aṭas akk n medden deg umaḍal, yella usalay n Louvre deg Paris, Asalay Aɣelnaw n Ccinwa deg Pikin, asalay n Smithsonian Institutuion deg Washington (tamaneɣt tamarikanit), British Museum d usalay n National Gallery deg London (tamaneɣt tabriṭanit), Metropolitan Museum of Art n temdint n New York, isalayen n Vatican d Usalay Alemmas n Tredsa deg Lezzayer Tamaneɣt. Ɣef leḥsab n Umɣiwan Anmaḍal n Yisalayen (World Museum Community), llan, deg umaḍal, ugar n 55.000 n yisalayen deg 202 n tmura.