ⴷⵣⴰⵢⴻⵔ
ⴷⵣⴰⵢⴻⵔ ⴷ ⵜⴰⵎⵓⵔⵜ ⵜⴰⵎⴻⵇⵇⵔⴰⵏⵜ, ⵜⴻⴱⴹⴰ ⵖⴻⴼ ⵙⵉⵏ ⵏ ⵢⵉⵎⵓⵔⴻⵏ ⵉⵎⴻⵇⵇⵔⴰⵏⴻⵏ : ⵜⴰⵎⵏⴰⴹⵜ ⵏ ⵓⴳⴰⴼⴰ ⵍⵍⴰⵏ ⴷⴻⴳ-ⵙ ⵢⵉⵣⵓⵖⴰⵔ, ⵉⴷⵓⵔⴰⵔ, ⵉⵖⴻⵣⵔⴰⵏ ⴷ ⵢⴻⴳⵯⵏⴰⵏ ⴰⵢ ⴷ-ⵢⴻⵣⴳⴰⵏ ⵙ ⵢⵉⴷⵉⵙ ⵏ ⵢⵉⵍⴻⵍ ⴰⴳⵔⴰⴽⴰⵍ ⴰⴽⴽⴻⴷ ⵜⴻⵎⵏⴰⴹⵜ ⵏ ⵡⴻⵏⵥⵓⵍ ⴰⵢ ⵢⴻⵟⵟⴼⴻⵏ 4 ⵏ ⵢⵉⵎⵓⵔⴻⵏ ⵖⴻⴼ 5 ⵙⴻⴳ ⵡⴰⴽⴰⵍ ⵏ ⵜⵎⵓⵔⵜ, ⴷ ⵜⵉⵏ ⵓⵎⵉ ⵇⵇⴰⵔⴻⵏ "ⵜⵉⵏⵉⵔⵉ ⵜⴰⵎⴻⵇⵇⵔⴰⵏⵜ" ⵏⴻⵖ "ⴰⵏⴻⵥⵔⵓⴼ"[1].
ⴰⴽⴰⵍⴻⵏ
ⴷⴻⴳ ⵓⵎⵓⵔ ⵏ ⵓⴳⴰⴼⴰ ⵏ ⵜⵎⵓⵔⵜ, ⵍⵍⴰⵏ ⵙⵉⵏ ⵏ ⵢⴻⵣⵔⴰⵔⴻⵏ ⵏ ⵢⵉⴷⵓⵔⴰⵔ ⴰⵢ ⵉⵣⴻⴳⵔⴻⵏ ⵜⴰⵎⵓⵔⵜ ⵙⴻⴳ ⵜⵍⵉⵙⴰ ⵏ ⵎⴻⵕⵕⵓⴽ ⴰⵔⵎⴰ ⴷ ⴰⴳⵎⵓⴹ ⵏ ⵜⵎⵓⵔⵜ, ⵙ ⵢⵉⴷⵉⵙ ⵏ ⵢⵉⵍⴻⵍ ⴰⴳⵔⴰⴽⴰⵍ.
ⴰⵣⵔⴰⵔ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⴷ ⵡⵉⵏ ⵓⵎⵉ ⵇⵇⴰⵔⴻⵏ ⴰⵟⵍⴰⵙ ⵏ ⵓⵜⴻⵍⵍ. ⴰⵎⵓⵔ ⴰⵎⴻⵇⵇⵔⴰⵏ ⵙⴻⴳ ⵜⴻⵎⴷⵉⵏⵉⵏ ⵏ ⴷⵣⴰⵢⴻⵔ ⵣⴳⴰⵏⵜ-ⴷ ⴷⴻⴳ ⵢⵉⵣⵓⵖⴰⵔ ⴰⵢ ⴷ-ⵢⴻⵣⴳⴰⵏ ⴳⴰⵔ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ ⴷ ⵢⵉⵍⴻⵍ ⴰⴳⵔⴰⴽⴰⵍ. ⴰⴽⴰⵍ ⵏ ⵢⵉⵣⵓⵖⴰⵔ-ⴰ ⴷ ⴰⴳⵉⵍⴰⵍ ⵢⴻⵔⵏⴰ ⴰⵎⵓⵔ ⴰⵎⴻⵇⵇⵔⴰⵏ ⵙⴻⴳ ⵢⵉⵎⴻⵣⴷⴰⵖ ⵏ ⵜⵎⵓⵔⵜ ⴷⵉⵏ ⴰⵢ ⵣⴻⴷⵖⴻⵏ. ⵜⴰⵎⵏⴰⴹⵜ-ⴰ ⵏ ⵓⴳⴰⴼⴰ ⵏ ⴷⵣⴰⵢⴻⵔ ⴰⵢⴷⴻⴳ ⴷⴷⵓⴽⴽⵍⴻⵏ ⵢⵉⴷⵓⵔⴰⵔ ⴷ ⵢⵉⵣⵓⵖⴰⵔ ⵇⵇⴰⵔⴻⵏ-ⴰⵙ ⴰⵜⴻⵍⵍ, ⵢⴻⵔⵏⴰ ⵍⵍⴰⵏ ⴷⴻⴳ-ⵙ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ, ⵉⵖⴻⵣⵔⴰⵏ ⴰⵢ ⴷ-ⵢⴻⵣⴳⴰⵏ ⴳⴰⵔ ⵢⵉⴷⵓⵔⴰⵔ-ⴰ ⴷ ⵢⵉⵣⵓⵖⴰⵔ ⴰⵎ ⵡⵉⵏ ⵏ ⵎⴻⵜⵜⵉⵊⴻⵜ, ⵢⴻⵔⵏⴰ ⴰⴽⴰⵍ ⴰⵢ ⵉⵇⴻⵔⴱⴻⵏ ⵖⴻⵔ ⵢⵉⵍⴻⵍ ⴷ ⵜⴻⵡⵔⵉⵔⵉⵏ, ⵎⴰⵛⴰ ⵜⵜⵉⵍⵉⵏ ⴳⴰⵔ-ⴰⵙⴻⵏⵜ ⵢⵉⴷⴻⴳⴳⴻⵏ ⵢⵓⴷⵔⴻⵏ ⴰⵏⴷⴰ ⴰⵢ ⵜⵜⵡⴰⴱⵏⴰⵏ ⵢⵉⵙⵓⴳⴰⵏ[2].
ⴰⵣⵔⴰⵔ ⵏ ⵢⵉⴷⵓⵔⴰⵔ ⵏ ⵡⴻⵏⵥⵓⵍ ⴷ ⵡⵉⵏ ⵓⵎⵉ ⵇⵇⴰⵔⴻⵏ ⴰⵟⵍⴰⵙ ⵏ ⵓⵏⴻⵥⵔⵓⴼ ⵢⴻⵔⵏⴰ ⴷ ⵡⵉⴷ ⴰⵢ ⴷ ⵉⴷⵔⴰⵔⴻⵏ ⴰⵢ ⴷ-ⵉⵃⴻⴱⵙⴻⵏ ⵉⵊⴷⵉ ⵏ ⵓⵏⴻⵥⵔⵓⴼ ⴰⴽⴽⴻⵏ ⵓⵔ ⴷ-ⵢⴻⵜⵜⴰⵡⴻⴹ ⴰⵔⴰ ⵖⴻⵔ ⵓⴳⴰⴼⴰ ⴰⵣⴻⴳⵣⴰⵡ ⵏ ⵜⵎⵓⵔⵜ. ⴳⴰⵔ ⵙⵉⵏ-ⴰ ⵏ ⵢⴻⵣⵔⴰⵔⴻⵏ ⵏ ⵢⵉⴷⵓⵔⴰⵔ, ⵜⴻⵍⵍⴰ ⵢⵉⵡⴻⵜ ⵏ ⵜⴻⵎⵏⴰⴹⵜ ⴷ ⵜⴰⵡⴻⵙⵄⴰⵏⵜ ⵏ ⵜⴻⵡⵔⵉⵔⵉⵏ ⴷ ⵢⴻⴳⵯⵏⴰⵏ, ⴷ ⵜⵉⵏ ⵓⵎⵉ ⵇⵇⴰⵔⴻⵏ ⵉⴳⵯⵏⴰⵏ ⵉⵄⵍⴰⵢⴰⵏⴻⵏ. ⵜⴰⵎⵏⴰⴹⵜ-ⴰ ⴷ ⵜⴰⴽⵉⵡⴰⵏⵜ ⵢⴻⵔⵏⴰ ⵍⵍⴰⵏ ⴷⴻⴳ-ⵙ ⵢⵉⴳⴻⵍⵎⵉⵎⴻⵏ ⵏ ⵜⵉⵙⴻⵏⵜ.
ⵙⵉⵏ-ⵏⵏⵉ ⵏ ⵢⴻⵣⵔⴰⵔⴻⵏ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⵏ ⵜⵎⵓⵔⵜ (ⴰⵟⵍⴰⵙ ⵏ ⵓⵜⴻⵍⵍ ⴷ ⵡⴰⵟⵍⴰⵙ ⵏ ⵓⵏⴻⵥⵔⵓⴼ) ⵜⵜⴻⵎⵍⵉⵍⵉⵏ ⴷⴻⴳ ⵡⴻⴳⵎⵓⴹ ⵏ ⵜⵎⵓⵔⵜ ⵏ ⴷⵣⴰⵢⴻⵔ. ⴷⴻⴳ ⵜⴻⵎⵏⴰⴹⵜ ⴰⵢⴷⴻⴳ ⵜⵜⴻⵎⵍⵉⵍⵉⵏ, ⴰⴽⴰⵍ ⴷ ⴰⵄⵍⴰⵢⴰⵏ ⴰⵎⴰ ⵟⵟⴻⵔⴼ ⵏ ⵢⵉⵍⴻⵍ (ⵜⵉⵎⵏⴰⴹⵉⵏ ⵏ ⴵⵉⴵⴻⵍ, ⵙⴽⵉⴽⴷⴰ ⴷ ⵄⴻⵏⵏⴰⴱⴰ), ⴰⵎⴰ ⴷⴰⵅⴻⵍ ⵜⵎⵓⵔⵜ (ⵇⵙⴻⵏⵟⵉⵏⴰ). ⴷⴻⴳ ⵡⴻⵏⵥⵓⵍ ⵏ ⵜⴻⵎⵏⴰⴹⵜ-ⴰ, ⴰⴷ ⵏⴰⴼ ⴷⴰⵖ ⵉⴷⵓⵔⴰⵔ ⵏ ⵡⴻⵡⵔⴰⵙ ⴷ ⵢⵉⵍⴻⵎⵎⵓⵛⴻⵏ ⴰⵢ ⵢⴻⵜⵜⵡⴰⵃⴻⵙⴱⴻⵏ ⴷ ⴰⵎⵓⵔ ⵙⴻⴳ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵢⴻⵔⵏⴰ ⵉⴷⵓⵔⴰⵔ-ⴰ ⵜⵜⴽⴻⵎⵎⵉⵍⴻⵏ ⴰⵔⵎⴰ ⴷ ⵜⵉⵍⵉⵙⴰ ⴳⴰⵔ ⴷⵣⴰⵢⴻⵔ ⴷ ⵜⵓⵏⴻⵙ. ⵉⴷⵓⵔⴰⵔ-ⴰ ⵙⴻⴳ ⵣⵉⴽ ⴰⵢ ⵍⵍⴰⵏ ⴷ ⵜⴰⵎⵏⴰⴹⵜ ⵡⵓⵖⵓⵔ ⵓⵔ ⵢⴻⵡⵄⴻⵕ ⴰⴷ ⵢⴰⴷⴻⴼ ⵓⵛⴻⵏⴳⵓ.
ⴰⵏⴻⵥⵔⵓⴼ ⴷ ⵜⴰⵎⵏⴰⴹⵜ ⵜⴰⵡⴻⵙⵄⴰⵏⵜ ⴰⵟⴰⵙ, ⴽⵔⴰ ⵙⴻⴳ ⵜⵉⵎⵏⴰⴹⵉⵏ-ⵏⵏⴻⵙ ⵉⴷⴻⵍ-ⵉⵜⴻⵏⵜ ⵢⴻⵊⴷⵉ, ⵎⴰ ⴷ ⵜⵉⵢⴰⴹ, ⴷ ⵉⵥⵔⴰ ⴰⵢ ⵜⴻⵏⵜ-ⵢⴻⴷⵍⴻⵏ. ⴽⵔⴰ ⵏ ⵜⴻⵎⵏⴰⴹⵉⵏ, ⴰⵙⵎⵉ ⴰⵔⴰ ⴷ-ⵉⵡⴻⵜ ⴷⴻⴳ-ⵙⴻⵏⵜ ⵡⴻⵏⵥⴰⵔ, ⵃⴻⵎⵎⵍⴻⵏ ⵢⵉⵖⴻⵣⵔⴰⵏ-ⵏⵙⴻⵏⵜ, ⵎⴰ ⴷ ⵜⵉⵎⵏⴰⴹⵉⵏ ⵏⵏⵉⴹⴻⵏ, ⵙⵄⴰⵏⵜ ⴷⴰⵖ ⴰⵎⴰⵏ ⴰⵢ ⴷ-ⵢⴻⵜⵜⴻⴼⴼⵖⴻⵏ ⵙⴻⴳ ⴷⴷⴰⵡ ⵜⵎⵓⵔⵜ, ⵢⴻⵔⵏⴰ ⴷ ⴰⵢⴰ ⴰⴽⴽ ⴰⵢ ⵢⴻⵜⵜⴰⴵⴵⴰⵏ ⴰⴷ ⵉⵍⵉⵏ ⵢⵉⵎⴻⴷⵡⴻⵏ ⴷ ⵛⵡⵉⵟ ⵏ ⵜⵉⵣⵣⴻⴳⵣⴻⵡⵜ ⴷⴻⴳ ⵜⴻⵎⵏⴰⴹⵉⵏ-ⴰ.
