ⴷⵣⴰⵢⴻⵔ
ⴷⵣⴰⵢⴻⵔ ⴷ ⵜⴰⵎⵓⵔⵜ ⵜⴰⵎⴻⵇⵇⵔⴰⵏⵜ, ⵜⴻⴱⴹⴰ ⵖⴻⴼ ⵙⵉⵏ ⵏ ⵢⵉⵎⵓⵔⴻⵏ ⵉⵎⴻⵇⵇⵔⴰⵏⴻⵏ : ⵜⴰⵎⵏⴰⴹⵜ ⵏ ⵓⴳⴰⴼⴰ ⵍⵍⴰⵏ ⴷⴻⴳ-ⵙ ⵢⵉⵣⵓⵖⴰⵔ[1], ⵉⴷⵓⵔⴰⵔ, ⵉⵖⴻⵣⵔⴰⵏ ⴷ ⵢⴻⴳⵯⵏⴰⵏ[2] ⵉ ⴷ-ⵢⴻⵣⴳⴰⵏ ⵙ ⵢⵉⴷⵉⵙ ⵏ ⵢⵉⵍⴻⵍ ⴰⴳⵔⴰⴽⴰⵍ[3] ⴰⴽⴽⴻⴷ ⵜⴻⵎⵏⴰⴹⵜ ⵏ ⵡⴻⵏⵥⵓⵍ ⵉ ⵢⴻⵟⵟⴼⴻⵏ 4 ⵏ ⵢⵉⵎⵓⵔⴻⵏ ⵖⴻⴼ 5 ⵙⴻⴳ ⵡⴰⴽⴰⵍ ⵏ ⵜⵎⵓⵔⵜ, ⴷ ⵜⵉⵏ ⵓⵎⵉ ⵇⵇⴰⵔⴻⵏ "ⵜⵉⵏⵉⵔⵉ ⵜⴰⵎⴻⵇⵇⵔⴰⵏⵜ" ⵏⴻⵖ "ⴰⵏⴻⵥⵔⵓⴼ"[4].
ⴰⴽⴰⵍⴻⵏ
ⴷⴻⴳ ⵓⵎⵓⵔ ⵏ ⵓⴳⴰⴼⴰ ⵏ ⵜⵎⵓⵔⵜ, ⵍⵍⴰⵏ ⵙⵉⵏ ⵏ ⵢⵉⵣⵓⵔⴰⵔ[5] ⵏ ⵢⵉⴷⵓⵔⴰⵔ ⵉ ⵉⵣⴻⴳⵔⴻⵏ ⵜⴰⵎⵓⵔⵜ ⵙⴻⴳ ⵜⵍⵉⵙⴰ ⵏ ⵎⴻⵕⵕⵓⴽ ⴰⵔⵎⴰ ⴷ ⴰⴳⵎⵓⴹ ⵏ ⵜⵎⵓⵔⵜ, ⵙ ⵢⵉⴷⵉⵙ ⵏ ⵢⵉⵍⴻⵍ ⴰⴳⵔⴰⴽⴰⵍ.
ⴰⵣⵔⴰⵔ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⴷ ⵡⵉⵏ ⵓⵎⵉ ⵇⵇⴰⵔⴻⵏ "ⴰⵟⵍⴰⵙ ⵏ ⵓⵜⴻⵍⵍ". ⴰⵎⵓⵔ ⴰⵎⴻⵇⵇⵔⴰⵏ ⵙⴻⴳ ⵢⵉⵖⵓⵔⴰⵎ ⵏ ⴷⵣⴰⵢⴻⵔ ⵣⴳⴰⵏⵜ-ⴷ ⴷⴻⴳ ⵢⵉⵣⵓⵖⴰⵔ ⵉ ⴷ-ⵢⴻⵣⴳⴰⵏ ⴳⴰⵔ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ ⴷ ⵢⵉⵍⴻⵍ ⴰⴳⵔⴰⴽⴰⵍ. ⴰⴽⴰⵍ ⵏ ⵢⵉⵣⵓⵖⴰⵔ-ⴰ ⵢⴻⴽⵔⵓⵥ ⵢⴻⵔⵏⴰ ⴰⵎⵓⵔ ⴰⵎⴻⵇⵇⵔⴰⵏ ⵙⴻⴳ ⵢⵉⵎⴻⵣⴷⴰⵖ ⵏ ⵜⵎⵓⵔⵜ ⴷⵉⵏ ⵉ ⵣⴻⴷⵖⴻⵏ. ⵜⴰⵎⵏⴰⴹⵜ-ⴰ ⵏ ⵓⴳⴰⴼⴰ ⵏ ⴷⵣⴰⵢⴻⵔ ⵉ ⴷⴻⴳ ⴷⴷⵓⴽⴽⵍⴻⵏ ⵢⵉⴷⵓⵔⴰⵔ ⴷ ⵢⵉⵣⵓⵖⴰⵔ ⵇⵇⴰⵔⴻⵏ-ⴰⵙ "ⴰⵜⴻⵍⵍ", ⵢⴻⵔⵏⴰ ⵍⵍⴰⵏ ⴷⴻⴳ-ⵙ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ, ⵉⵖⴻⵣⵔⴰⵏ ⵉ ⴷ-ⵢⴻⵣⴳⴰⵏ ⴳⴰⵔ ⵢⵉⴷⵓⵔⴰⵔ-ⴰ ⴷ ⵢⵉⵣⵓⵖⴰⵔ ⴰⵎ ⵡⵉⵏ ⵏ ⵜⵎⴻⵜⵜⵉⵊⵜ, ⵢⴻⵔⵏⴰ ⴰⴽⴰⵍ ⵉ ⵢⵓⴷⵙⴻⵏ ⵉⵍⴻⵍ ⴷ ⵜⴻⵡⵔⵉⵔⵉⵏ, ⵎⴰⵛⴰ ⵜⵜⵉⵍⵉⵏ ⴳⴰⵔ-ⴰⵙⴻⵏⵜ ⵢⵉⴷⴻⴳⴳⴻⵏ ⵢⵓⴷⵔⴻⵏ ⴰⵏⴷⴰ ⵉ ⵜⵜⵡⴻⵚⴽⴻⵏ ⵢⵉⵙⵓⴳⴰⵏ.
ⴰⵣⵔⴰⵔ ⵏ ⵢⵉⴷⵓⵔⴰⵔ ⵏ ⵡⴻⵏⵥⵓⵍ ⴷ ⵡⵉⵏ ⵓⵎⵉ ⵇⵇⴰⵔⴻⵏ "ⴰⵟⵍⴰⵙ ⵏ ⵓⵏⴻⵥⵔⵓⴼ" ⵢⴻⵔⵏⴰ ⴷ ⵡⵉⴷ ⴰⵢ ⴷ ⵉⴷⵓⵔⴰⵔ ⵉ ⴷ-ⵢⴻⵙⴱⴻⴷⴷⴻⵏ ⵉⵊⴷⵉ ⵏ ⵓⵏⴻⵥⵔⵓⴼ ⴰⴽⴽⴻⵏ ⵓⵔ ⴷ-ⵢⴻⵜⵜⴰⵡⴻⴹ ⴰⵔⴰ ⵖⴻⵔ ⵓⴳⴰⴼⴰ ⴰⵣⴻⴳⵣⴰⵡ ⵏ ⵜⵎⵓⵔⵜ. ⴳⴰⵔ ⵙⵉⵏ-ⴰ ⵏ ⵢⴻⵣⵔⴰⵔⴻⵏ ⵏ ⵢⵉⴷⵓⵔⴰⵔ, ⵜⴻⵍⵍⴰ ⵢⵉⵡⴻⵜ ⵏ ⵜⴻⵎⵏⴰⴹⵜ ⴷ ⵜⴰⵀⵔⴰⵡⴰⵏⵜ ⵏ ⵜⴻⵡⵔⵉⵔⵉⵏ ⴷ ⵢⴻⴳⵯⵏⴰⵏ, ⴷ ⵜⵉⵏ ⵓⵎⵉ ⵇⵇⴰⵔⴻⵏ "ⵉⴳⵯⵏⴰⵏ ⵓⵏⵏⵉⴳⴻⵏ". ⵜⴰⵎⵏⴰⴹⵜ-ⴰ ⴷ ⵜⴰⵇⵓⵔⴰⵏⵜ ⵢⴻⵔⵏⴰ ⵍⵍⴰⵏ ⴷⴻⴳ-ⵙ ⵢⵉⴳⴻⵍⵎⵉⵎⴻⵏ ⵏ ⵜⵉⵙⴻⵏⵜ.
ⵙⵉⵏ-ⵏⵏⵉ ⵏ ⵢⵉⵣⵓⵔⴰⵔ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⵏ ⵜⵎⵓⵔⵜ (ⴰⵟⵍⴰⵙ ⵏ ⵓⵜⴻⵍⵍ ⴷ ⵡⴰⵟⵍⴰⵙ ⵏ ⵓⵏⴻⵥⵔⵓⴼ) ⵜⵜⴻⵎⵍⵉⵍⵉⵏ ⴷⴻⴳ ⵡⴻⴳⵎⵓⴹ ⵏ ⵜⵎⵓⵔⵜ ⵏ ⴷⵣⴰⵢⴻⵔ. ⴷⴻⴳ ⵜⴻⵎⵏⴰⴹⵜ ⵉ ⴷⴻⴳ ⵜⵜⴻⵎⵍⵉⵍⵉⵏ, ⴰⴽⴰⵍ ⴷ ⵓⵏⵏⵉⴳ ⴰⵎⴰ ⵙ ⵢⵉⴷⵉⵙ ⵏ ⵢⵉⵍⴻⵍ (ⵜⵉⵎⵏⴰⴹⵉⵏ ⵏ ⴵⵉⴵⴻⵍ, ⵙⴽⵉⴽⴷⴰ ⴷ ⵄⴻⵏⵏⴰⴱⴰ), ⴰⵎⴰ ⵙ ⵊⴰⵊ ⵏ ⵜⵎⵓⵔⵜ (ⵇⵙⴻⵏⵟⵉⵏⴰ). ⴷⴻⴳ ⵡⴻⵏⵥⵓⵍ ⵏ ⵜⴻⵎⵏⴰⴹⵜ-ⴰ, ⴰⴷ ⵏⴰⴼ ⴷⴰⵖ ⵉⴷⵓⵔⴰⵔ ⵏ ⵡⴻⵡⵔⴰⵙ ⴷ ⵢⵉⵍⴻⵎⵎⵓⵛⴻⵏ ⵉ ⵢⵓⴹⴰⵏⴻⵏ ⴷ ⴰⵎⵓⵔ ⵙⴻⴳ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵢⴻⵔⵏⴰ ⵉⴷⵓⵔⴰⵔ-ⴰ ⵜⵜⵙⵉⵖⵉⵏ ⴰⵔⵎⴰ ⴷ ⵜⵉⵍⵉⵙⴰ ⴳⴰⵔ ⴷⵣⴰⵢⴻⵔ ⴷ ⵜⵓⵏⴻⵙ. ⵉⴷⵓⵔⴰⵔ-ⴰ ⵙⴻⴳ ⵣⵉⴽ ⵉ ⵍⵍⴰⵏ ⴷ ⵜⴰⵎⵏⴰⴹⵜ ⵡⵓⵖⵓⵔ ⵢⵓⵍⵖⴰ ⴰⴷ ⵢⴻⴽⵛⴻⵎ ⵓⵛⴻⵏⴳⵓ.
ⴰⵏⴻⵥⵔⵓⴼ ⴷ ⵜⴰⵎⵏⴰⴹⵜ ⵜⴰⵀⵔⴰⵡⴰⵏⵜ ⴰⵟⴰⵙ, ⴽⵔⴰ ⵙⴻⴳ ⵜⴻⵎⵏⴰⴹⵉⵏ-ⵉⵏⴻⵙ ⵉⴷⴻⵍ-ⵉⵜⴻⵏⵜ ⵢⵉⵊⴷⵉ, ⵎⴰ ⴷ ⵜⵉⵢⴰⴹ, ⴷ ⵉⵥⵔⴰ ⴰⵢ ⵜⴻⵏⵜ-ⵢⴻⴷⵍⴻⵏ. ⴽⵔⴰ ⵏ ⵜⴻⵎⵏⴰⴹⵉⵏ, ⴰⵙⵎⵉ ⴰⵔⴰ ⴷ-ⵉⵡⴻⵜ ⴷⴻⴳ-ⵙⴻⵏⵜ ⵡⴻⵏⵥⴰⵔ, ⵜⵜⴰⵞⴰⵕⴻⵏ ⵢⵉⵖⴻⵣⵔⴰⵏ-ⵏⵙⴻⵏⵜ, ⵎⴰ ⴷ ⵜⵉⵎⵏⴰⴹⵉⵏ ⵏⵏⵉⴹⴻⵏ, ⵖⴻⵔ-ⵙⴻⵏⵜ ⴷⴰⵖ ⴰⵎⴰⵏ ⵉ ⴷ-ⵢⴻⵜⵜⴻⴼⴼⵖⴻⵏ ⵙⴻⴳ ⴷⴷⴰⵡ ⵜⵎⵓⵔⵜ, ⵢⴻⵔⵏⴰ ⴷ ⴰⵢⴰ ⴰⴽⴽ ⴰⵢ ⵢⴻⵜⵜⴰⴵⴵⴰⵏ ⴰⴷ ⵉⵍⵉⵏ ⵢⵉⵎⴻⴷⵡⴰⵏ ⴷ ⵡⴰⵣⵓⵃ ⵏ ⵜⵉⵣⵣⴻⴳⵣⴻⵡⵜ ⴷⴻⴳ ⵜⴻⵎⵏⴰⴹⵉⵏ-ⴰ.
