ⴷⵣⴰⵢⴻⵔ
ⴷⵣⴰⵢⴻⵔ ⴷ ⵜⴰⵎⵓⵔⵜ ⵜⴰⵎⴻⵇⵇⵔⴰⵏⵜ, ⵜⴻⴱⴹⴰ ⵖⴻⴼ ⵙⵉⵏ ⵏ ⵢⵉⵎⵓⵔⴻⵏ ⵉⵎⴻⵇⵇⵔⴰⵏⴻⵏ : ⵜⴰⵎⵏⴰⴹⵜ ⵏ ⵓⴳⴰⴼⴰ ⵍⵍⴰⵏ ⴷⴻⴳ-ⵙ ⵢⵉⵣⵓⵖⴰⵔ, ⵉⴷⵓⵔⴰⵔ, ⵉⵖⴻⵣⵔⴰⵏ ⴷ ⵢⴻⴳⵯⵏⴰⵏ ⴰⵢ ⴷ-ⵢⴻⵣⴳⴰⵏ ⵙ ⵢⵉⴷⵉⵙ ⵏ ⵢⵉⵍⴻⵍ ⴰⴳⵔⴰⴽⴰⵍ ⴰⴽⴽⴻⴷ ⵜⴻⵎⵏⴰⴹⵜ ⵏ ⵡⴻⵏⵥⵓⵍ ⴰⵢ ⵢⴻⵟⵟⴼⴻⵏ 4 ⵏ ⵢⵉⵎⵓⵔⴻⵏ ⵖⴻⴼ 5 ⵙⴻⴳ ⵡⴰⴽⴰⵍ ⵏ ⵜⵎⵓⵔⵜ, ⴷ ⵜⵉⵏ ⵓⵎⵉ ⵇⵇⴰⵔⴻⵏ "ⵜⵉⵏⵉⵔⵉ ⵜⴰⵎⴻⵇⵇⵔⴰⵏⵜ" ⵏⴻⵖ "ⴰⵏⴻⵥⵔⵓⴼ"[1].
ⴰⴽⴰⵍⴻⵏ
ⴷⴻⴳ ⵓⵎⵓⵔ ⵏ ⵓⴳⴰⴼⴰ ⵏ ⵜⵎⵓⵔⵜ, ⵍⵍⴰⵏ ⵙⵉⵏ ⵏ ⵢⵉⵣⵓⵔⴰⵔ ⵏ ⵢⵉⴷⵓⵔⴰⵔ ⴰⵢ ⵉⵣⴻⴳⵔⴻⵏ ⵜⴰⵎⵓⵔⵜ ⵙⴻⴳ ⵜⵍⵉⵙⴰ ⵏ ⵎⴻⵕⵕⵓⴽ ⴰⵔⵎⴰ ⴷ ⴰⴳⵎⵓⴹ ⵏ ⵜⵎⵓⵔⵜ, ⵙ ⵢⵉⴷⵉⵙ ⵏ ⵢⵉⵍⴻⵍ ⴰⴳⵔⴰⴽⴰⵍ.
ⴰⵣⵔⴰⵔ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⴷ ⵡⵉⵏ ⵓⵎⵉ ⵇⵇⴰⵔⴻⵏ "ⴰⵟⵍⴰⵙ ⵏ ⵓⵜⴻⵍⵍ". ⴰⵎⵓⵔ ⴰⵎⴻⵇⵇⵔⴰⵏ ⵙⴻⴳ ⵢⵉⵖⵓⵔⴰⵎ ⵏ ⴷⵣⴰⵢⴻⵔ ⵣⴳⴰⵏⵜ-ⴷ ⴷⴻⴳ ⵢⵉⵣⵓⵖⴰⵔ ⴰⵢ ⴷ-ⵢⴻⵣⴳⴰⵏ ⴳⴰⵔ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ ⴷ ⵢⵉⵍⴻⵍ ⴰⴳⵔⴰⴽⴰⵍ. ⴰⴽⴰⵍ ⵏ ⵢⵉⵣⵓⵖⴰⵔ-ⴰ ⵢⴻⴽⵔⵓⵥ ⵢⴻⵔⵏⴰ ⴰⵎⵓⵔ ⴰⵎⴻⵇⵇⵔⴰⵏ ⵙⴻⴳ ⵢⵉⵎⴻⵣⴷⴰⵖ ⵏ ⵜⵎⵓⵔⵜ ⴷⵉⵏ ⴰⵢ ⵣⴻⴷⵖⴻⵏ. ⵜⴰⵎⵏⴰⴹⵜ-ⴰ ⵏ ⵓⴳⴰⴼⴰ ⵏ ⴷⵣⴰⵢⴻⵔ ⴰⵢⴷⴻⴳ ⴷⴷⵓⴽⴽⵍⴻⵏ ⵢⵉⴷⵓⵔⴰⵔ ⴷ ⵢⵉⵣⵓⵖⴰⵔ ⵇⵇⴰⵔⴻⵏ-ⴰⵙ "ⴰⵜⴻⵍⵍ", ⵢⴻⵔⵏⴰ ⵍⵍⴰⵏ ⴷⴻⴳ-ⵙ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵏ ⵓⵜⴻⵍⵍ, ⵉⵖⴻⵣⵔⴰⵏ ⴰⵢ ⴷ-ⵢⴻⵣⴳⴰⵏ ⴳⴰⵔ ⵢⵉⴷⵓⵔⴰⵔ-ⴰ ⴷ ⵢⵉⵣⵓⵖⴰⵔ ⴰⵎ ⵡⵉⵏ ⵏ ⵜⵎⴻⵜⵜⵉⵊⵜ, ⵢⴻⵔⵏⴰ ⴰⴽⴰⵍ ⴰⵢ ⵢⵓⴷⵙⴻⵏ ⵉⵍⴻⵍ ⴷ ⵜⴻⵡⵔⵉⵔⵉⵏ, ⵎⴰⵛⴰ ⵜⵜⵉⵍⵉⵏ ⴳⴰⵔ-ⴰⵙⴻⵏⵜ ⵢⵉⴷⴻⴳⴳⴻⵏ ⵢⵓⴷⵔⴻⵏ ⴰⵏⴷⴰ ⴰⵢ ⵜⵜⵡⴰⵙⵓⵍⵉⵏ ⵢⵉⵙⵓⴳⴰⵏ[2].
ⴰⵣⵔⴰⵔ ⵏ ⵢⵉⴷⵓⵔⴰⵔ ⵏ ⵡⴻⵏⵥⵓⵍ ⴷ ⵡⵉⵏ ⵓⵎⵉ ⵇⵇⴰⵔⴻⵏ "ⴰⵟⵍⴰⵙ ⵏ ⵓⵏⴻⵥⵔⵓⴼ" ⵢⴻⵔⵏⴰ ⴷ ⵡⵉⴷ ⴰⵢ ⴷ ⵉⴷⵓⵔⴰⵔ ⴰⵢ ⴷ-ⵢⴻⵙⴱⴻⴷⴷⴻⵏ ⵉⵊⴷⵉ ⵏ ⵓⵏⴻⵥⵔⵓⴼ ⴰⴽⴽⴻⵏ ⵓⵔ ⴷ-ⵢⴻⵜⵜⴰⵡⴻⴹ ⴰⵔⴰ ⵖⴻⵔ ⵓⴳⴰⴼⴰ ⴰⵣⴻⴳⵣⴰⵡ ⵏ ⵜⵎⵓⵔⵜ. ⴳⴰⵔ ⵙⵉⵏ-ⴰ ⵏ ⵢⴻⵣⵔⴰⵔⴻⵏ ⵏ ⵢⵉⴷⵓⵔⴰⵔ, ⵜⴻⵍⵍⴰ ⵢⵉⵡⴻⵜ ⵏ ⵜⴻⵎⵏⴰⴹⵜ ⴷ ⵜⴰⵀⵔⴰⵡⴰⵏⵜ ⵏ ⵜⴻⵡⵔⵉⵔⵉⵏ ⴷ ⵢⴻⴳⵯⵏⴰⵏ, ⴷ ⵜⵉⵏ ⵓⵎⵉ ⵇⵇⴰⵔⴻⵏ "ⵉⴳⵯⵏⴰⵏ ⵓⵏⵏⵉⴳⴻⵏ". ⵜⴰⵎⵏⴰⴹⵜ-ⴰ ⴷ ⵜⴰⵇⵓⵔⴰⵏⵜ ⵢⴻⵔⵏⴰ ⵍⵍⴰⵏ ⴷⴻⴳ-ⵙ ⵢⵉⴳⴻⵍⵎⵉⵎⴻⵏ ⵏ ⵜⵉⵙⴻⵏⵜ.
ⵙⵉⵏ-ⵏⵏⵉ ⵏ ⵢⵉⵣⵓⵔⴰⵔ ⵏ ⵢⵉⴷⵓⵔⴰⵔ ⵏ ⵓⴳⴰⴼⴰ ⵏ ⵜⵎⵓⵔⵜ (ⴰⵟⵍⴰⵙ ⵏ ⵓⵜⴻⵍⵍ ⴷ ⵡⴰⵟⵍⴰⵙ ⵏ ⵓⵏⴻⵥⵔⵓⴼ) ⵜⵜⴻⵎⵍⵉⵍⵉⵏ ⴷⴻⴳ ⵡⴻⴳⵎⵓⴹ ⵏ ⵜⵎⵓⵔⵜ ⵏ ⴷⵣⴰⵢⴻⵔ. ⴷⴻⴳ ⵜⴻⵎⵏⴰⴹⵜ ⴰⵢⴷⴻⴳ ⵜⵜⴻⵎⵍⵉⵍⵉⵏ, ⴰⴽⴰⵍ ⴷ ⵓⵏⵏⵉⴳ ⴰⵎⴰ ⵙ ⵢⵉⴷⵉⵙ ⵏ ⵢⵉⵍⴻⵍ (ⵜⵉⵎⵏⴰⴹⵉⵏ ⵏ ⴵⵉⴵⴻⵍ, ⵙⴽⵉⴽⴷⴰ ⴷ ⵄⴻⵏⵏⴰⴱⴰ), ⴰⵎⴰ ⵙ ⵊⴰⵊ ⵏ ⵜⵎⵓⵔⵜ (ⵇⵙⴻⵏⵟⵉⵏⴰ). ⴷⴻⴳ ⵡⴻⵏⵥⵓⵍ ⵏ ⵜⴻⵎⵏⴰⴹⵜ-ⴰ, ⴰⴷ ⵏⴰⴼ ⴷⴰⵖ ⵉⴷⵓⵔⴰⵔ ⵏ ⵡⴻⵡⵔⴰⵙ ⴷ ⵢⵉⵍⴻⵎⵎⵓⵛⴻⵏ ⴰⵢ ⵢⵓⴹⴰⵏⴻⵏ ⴷ ⴰⵎⵓⵔ ⵙⴻⴳ ⵢⵉⴷⵓⵔⴰⵔ ⵏ ⵡⴰⵟⵍⴰⵙ ⵢⴻⵔⵏⴰ ⵉⴷⵓⵔⴰⵔ-ⴰ ⵜⵜⵙⵉⵖⵉⵏ ⴰⵔⵎⴰ ⴷ ⵜⵉⵍⵉⵙⴰ ⴳⴰⵔ ⴷⵣⴰⵢⴻⵔ ⴷ ⵜⵓⵏⴻⵙ. ⵉⴷⵓⵔⴰⵔ-ⴰ ⵙⴻⴳ ⵣⵉⴽ ⴰⵢ ⵍⵍⴰⵏ ⴷ ⵜⴰⵎⵏⴰⴹⵜ ⵡⵓⵖⵓⵔ ⵢⴻⴳⴳⴻⵔⵎⴻⵎ ⴰⴷ ⵢⴰⴷⴻⴼ ⵓⵛⴻⵏⴳⵓ.
ⴰⵏⴻⵥⵔⵓⴼ ⴷ ⵜⴰⵎⵏⴰⴹⵜ ⵜⴰⵀⵔⴰⵡⴰⵏⵜ ⴰⵟⴰⵙ, ⴽⵔⴰ ⵙⴻⴳ ⵜⴻⵎⵏⴰⴹⵉⵏ-ⵉⵏⴻⵙ ⵉⴷⴻⵍ-ⵉⵜⴻⵏⵜ ⵢⵉⵊⴷⵉ, ⵎⴰ ⴷ ⵜⵉⵢⴰⴹ, ⴷ ⵉⵥⵔⴰ ⴰⵢ ⵜⴻⵏⵜ-ⵢⴻⴷⵍⴻⵏ. ⴽⵔⴰ ⵏ ⵜⴻⵎⵏⴰⴹⵉⵏ, ⴰⵙⵎⵉ ⴰⵔⴰ ⴷ-ⵉⵡⴻⵜ ⴷⴻⴳ-ⵙⴻⵏⵜ ⵡⴻⵏⵥⴰⵔ, ⵃⴻⵎⵎⵍⴻⵏ ⵢⵉⵖⴻⵣⵔⴰⵏ-ⵏⵙⴻⵏⵜ, ⵎⴰ ⴷ ⵜⵉⵎⵏⴰⴹⵉⵏ ⵏⵏⵉⴹⴻⵏ, ⵖⴻⵔ-ⵙⴻⵏⵜ ⴷⴰⵖ ⴰⵎⴰⵏ ⴰⵢ ⴷ-ⵢⴻⵜⵜⴻⴼⴼⵖⴻⵏ ⵙⴻⴳ ⴷⴷⴰⵡ ⵜⵎⵓⵔⵜ, ⵢⴻⵔⵏⴰ ⴷ ⴰⵢⴰ ⴰⴽⴽ ⴰⵢ ⵢⴻⵜⵜⴰⴵⴵⴰⵏ ⴰⴷ ⵉⵍⵉⵏ ⵢⵉⵎⴻⴷⵡⴰⵏ ⴷ ⵡⴰⵣⵓⵃ ⵏ ⵜⵉⵣⵣⴻⴳⵣⴻⵡⵜ ⴷⴻⴳ ⵜⴻⵎⵏⴰⴹⵉⵏ-ⴰ.
