Amseqdac:Imedyazen/amedya

Tamsalt n xalifa Bank: 385 n yinagan umi ara d-ɣren i wass n 4 Mayyu ɣer wexxam n ccṛeɛ n Leblida

LEBLIDA – S ujemmal, 385 n yinagan umi ara d-ɣren i was n 4 Mayyu ay d-yetteddun ɣer wexxam n ccṛeɛ n tejrimin n Leblida deg temsalt n ccṛeɛ n xalifa Bank, ɣef wakken ay d-tettwaxebber WDƔ sɣur teɣbula ixeddmen deg ccṛeɛ.

133 n yemdanen niḍen, gar-asen wid yeḍruran seg temsalt-a d wid ay d-yeccetkan, ad asen-d-ɣren daɣ akken ad ḥedṛen deg ccṛeɛ-a aydeg yella Antar Menouar d lqaḍi, ɣef wakken ay d-tenna teɣbalut-a ay d-yernan dakken amciweṛ ɣef leḥkem n ccṛeɛ ad d-yili deg tzeqqa 01 n wexxam-nni n ccṛeɛ.

D lqaḍi-a ay yellan d aselway d tbeddit-nni taneggarut n truẓi n ccṛeɛ ay d-yellan deg wass n 2 Yebrir 2013.

Wid yettwattehmen ad ttwacaṛɛen ladɣa ɣef ttehmat-a: “amɛawen i lmend n lmaḍerra”, “tukerḍa tameqrant”, “akellex”, “lexdeɛ seg laman’’ d ‘’uṛeqqed n lekwaɣeḍ unṣiben’’.

Aneɣlaf n Teɣdemt, Tayeb Louh, yenna-d seg melmi kan dakken asenqed deg wayen yerzan tamsalt n El Khalifa la yettkemmil « s uqader n leqwanen yerna deg uqaleb n wemɛawen agraɣlan deg wenrar-a. »

Ccṛeɛ amezwaru, ay d-yellan deg Meɣres n 2007, yella-d deg wexxam-nni n ccṛeɛ yerna ifuk s usuffeɣ n leḥkumat n gar useggas d 20 n yiseggasen n lḥebs d usuref i wazal n xemsin n medden, gar-asen 94 seg wid ay yettwattehmen yerna bedden sdat ccṛeɛ.

Ɛecṛa n yemdanen niḍen yettwattehmen yeḥkem-d fell-asen ccṛeɛ war ma ḥedṛen, gar-asen ametthum amezwaru deg temsalt-a, Abdelmoumene Rafiq xalifa, umi yettwaḥkem lḥebs s teɣzef n tudert.

Tamsalt-a tuweḍ ɣer ccṛeɛ sdeffir ma tufa-d lbanka n Lezzayer dakken llan 3,2 n yimelyaṛen n yidinaṛen deg « usenduq agejdan n El Khalifa Bank » ay yellan d nettat ay d lbanka tusligt tamezwarut deg lezzayer.

Argaz n yiweẓla aqbur, Rafik Abdelmoumene Khelifa, yerwel ɣer Briṭanya Tameqrant deg 2003, yerna teffeɣ-d fell-as lewṣaya tagraɣlant n tuḍḍfa , sakkin yettwazen-d ɣer Lezzayer deg 2013, « s uqader n leqwanin d yiḥezziben n wemtawa n lqanun » yellan gar Lezzayer d Briṭanya Tameqrant.