Amseqdac:Imedyazen

Aneẓruf Utrim: tessuter Tuṛuft assemɣer n lewṣaya n Minurso akken ad d-telhu s yizerfan n umdan

BRUXELLES – Iɛawed-d Umni (barlaman) uṛufi i teɣri-nnes akken ad tettwassemɣer lewṣaya n MINURSO akken ad d-tḥaz ula d taɛessast n yizerfan n umdan deg Uneẓruf Utrim, imi tuɣdaḍin niḍen n Yiɣlanen Yeddukklen i uḥraz n talwit deg tmura niḍen dima lehhunt-d s tɛessast n yizerfan n umdan.

Deg yiwen n uṛabul ay d-yessuffeɣ Umni Uṛufi ass n laṛebɛa, yenna-d d akken yewhem amek MINURSO (tuɣdaḍt n ussuddes n tsefrant deg Uneẓruf Utrim) d nettat ay d « tuɣdaḍt tawḥidt n Yiɣlanen Yeddukklen deg Tefriqt ur yesɛin ara lewṣaya akken ad tɛass izerfan n umdan », dɣa ɣef waya, « ulac ttawil i ukcaf n urkaḍ n yizerfan n umdan (deg Uneẓruf Utrim) ».

Amni Uṛufi yesɛedda yiwet n tenwi (taɛdil), deg Dujembeṛ yezrin, i ussumer n ussemɣer n lewṣaya n MINURSO akken ad tɛass yerna ad tḥudd izerfan n umdan deg Uneẓruf Utrim yellan ddaw tuḍḍfa n Meṛṛuk. Tinwi-a tessumer-itt-id tegrawt takunfidiṛalit n Uzelmaḍ Aduklan Uṛufi/Azelmaḍ Azegzaw Agafan yettekkan deg Umni Uṛufi.

Assemɣer n lewṣaya n MINURSO akken ad d-tḥaz izerfan n umdan d ayen ad yeǧǧen Aseqqamu n Tɣellist (amn) n Yiɣlanen Yeddukklen ad d-yettaḍḍaf isalan aydeg yella laman yerna s tɣawla ɣef tegnit n yizerfan n umdan deg Uneẓruf Utrim, yerna aya ad yessedrem daɣ tiḥemliwin timeṛṛukiyin n tkerkas ɣef yizerfan n umdan deg tmurt-a yettwaṭṭfen.