Tirana
Tirana d tamaneɣt n Albanya yerna d nettat ay d tamdint tameqrant akk n tmurt-a (zedɣen-tt 520.000 n yimezdaɣen).
Tirana tezga-d ɣef wasif n Ishm, yerna d nettat d ul n temguri[1] ed yedles n Albanya. Deg Tirana ad naf lluzinat n tuccit, n tmacinin, n ccac, n yisafaren ed yemɣuzen[2]. Seg yiseggasen n 1920 ar ass-a, Tirana tennerna s waṭas yerna kecment-tt-id aṭas n temgiryin timaynutin.
Deg temdint-a, nezmer daɣen ad naf tasdawit (ay d-yettwasbedden deg 1957) ed Usudu Albani n Tussniwin.
Ass-a, iduba[3] n Albanya la ɛerrḍen amek ara rren Tirana d tamdint ay d-ijebbden imerrayen[4], ɣas ma yella tama n Balqan mazal llan deg-s wuguren isertiyen ay d-yebdan deg yiseggasen n 1990 deg Albanya, Busnya ed Hirziguvina, Kosovo ed Masidunya.
Amezruy
D ajiniṛal aɛetmani Sulejman Pasha ay d-yesbedden Tirana deg 1614, yerna isemma-as, deg laṣel, « Ṭehran » i wakken ad yerr tajmilt i yimenɣi-nni ay yerbeḥ deg Ṭehran (deg Iṛan). Deg Yennayer n 1920, anabaḍ uɛḍil[5] n Weswir n Lushj yefren Tirana d tamaneɣt n tmurt, ɣas akken tella mazal-itt d tamdint tameẓyant. Deg Wambeṛ n 1944, deg Tirana ay d-yettwassebded unabaḍ asduklan[6] n Enver Hoxha.
Deg yiseggasen n 1950, tamguri tennerna s waṭas yerna s tɣawla deg Tirana, yerna d aya ay d-ijebden ɣer-s medden armi d asmi tuweḍ ɣer 137.000 n yimezdaɣen deg 1960. Deg tgara n yiseggasen n 1980 ed tezwara n yiseggasen 1990, llant-d tmeskanin timeqranin deg temdint-a, yerna d aya ay yessawḍen ɣer uɣelluy n unabaḍ asduklan n Albanya.
